മുംബൈ: ഇംഗ്ലണ്ടില്‍ നടന്ന ലോകകപ്പ് സെമിയില്‍ ടീം തോറ്റു പുറത്തായെങ്കിലും ഇന്ത്യയുടെ മുഖ്യ പരിശീലകനായ രവിശാസ്ത്രിയുടെ നേതൃപാടവത്തില്‍ ബി.സി.സി.ഐക്ക് തെല്ലും സംശയമില്ല.
അതുകൊണ്ടാകണം പുതിയ കരാറില്‍ രവിശാസ്ത്രിക്ക് 20 ശതമാനം ശമ്പള വര്‍ധനവ് നല്‍കാന്‍ ക്രിക്കറ്റ് ബോര്‍ഡ് തീരുമാനിച്ചത്. പുതിയ കരാര്‍പ്രകാരം പ്രതിവര്‍ഷം പത്തു കോടി രൂപയായിരിക്കും ശാസ്ത്രിയുടെ പ്രതിഫലം. 2017ല്‍ എട്ടു കോടി രൂപ ശമ്പള വ്യവസ്ഥയിലാണ് രവിശാസ്ത്രി ഇന്ത്യന്‍ ടീമിന്റെ മുഖ്യ പരിശീലകനായത്. നിലവില്‍ ഏറ്റവും ഉയര്‍ന്ന പ്രതിഫലം കൈപ്പറ്റുന്ന ക്രിക്കറ്റ് പരിശീലകരില്‍ ഒരാളാണ് രവിശാസ്ത്രി. 2016ല്‍ അനില്‍ കുംബ്ലെ പരിശീലകനായി ചുമതലയേല്‍ക്കുമ്പോള്‍ പ്രതിവര്‍ഷം 6.6 കോടി രൂപയായിരുന്നു ശമ്പള കരാര്‍.