ആദില്‍ ആറാട്ടുപുഴ
തിരുവനന്തപുരം: ദക്ഷിണാഫ്രിക്ക എ ടീമിനെതിരായ ഒന്നാം ടെസ്റ്റില്‍ സന്ദര്‍ശകരെ എറിഞ്ഞൊതുക്കി ഇന്ത്യന്‍ യുവ നിര. ചതുര്‍ദിന ടെസ്റ്റിന്റെ ആദ്യ ദിനം ഉച്ചകഴിഞ്ഞപ്പോഴേക്കും ദക്ഷിണാഫ്രിക്കന്‍ ടീമിനെ ഇന്ത്യന്‍ ബൗളര്‍മാര്‍ പവലിയനിലെത്തിച്ചു. 164 റണ്‍സിന് അടിയറ പറഞ്ഞ ദക്ഷിണാഫ്രിക്കന്‍ നിര മറുപടി ബാറ്റിങ്ങിനിറങ്ങിയ ഇന്ത്യന്‍ ബാറ്റ്‌സ്മാന്‍മാരുടെ കൈയില്‍നിന്ന് കണക്കിന് തല്ല് വാങ്ങിക്കൂട്ടുകയും ചെയ്തു. ആദ്യ ദിനം സ്റ്റംപെടുക്കുമ്പോള്‍ രണ്ട് വിക്കറ്റിന് 129 എന്ന നിലയിലാണ് ഇന്ത്യ. സ്‌കോര്‍: ദക്ഷിണാഫ്രിക്ക- 164ന് ഓള്‍ ഔട്ട് (51.5 ഓവര്‍). ഇന്ത്യ- 129ന് രണ്ട് (38 ഓവര്‍).
ഈര്‍പ്പം നില്‍ക്കുന്ന പിച്ചിന്റെ ആനുകൂല്യം മുതലാക്കാനുറച്ച് ടോസ് നേടിയ ഇന്ത്യ ദക്ഷിണാഫ്രിക്കയെ ബാറ്റിങ്ങിനയക്കുകയായിരുന്നു. നായകന്‍ ശുഭ്മാന്‍ ഗില്ലിന്റെ തീരുമാനം ശരിവയ്ക്കുന്ന രീതിയല്‍ പന്തെറിഞ്ഞ ഇന്ത്യന്‍ പേസര്‍മാര്‍ ആദ്യ 10 ഓവറുകള്‍ക്കുള്ളില്‍ തന്നെ ദക്ഷിണാഫ്രിക്കയുടെ മൂന്ന് മുന്‍നിര താരങ്ങളെ കൂടാരം കയറ്റി.
ദക്ഷിണാഫ്രിക്കന്‍ നായകന്‍ എയ്ഡന്‍ മര്‍ക്രാമിനെയും ഓപ്പണര്‍ പീറ്റര്‍ മലാനെയും പൂജ്യത്തിന് പുറത്താക്കിയ ഇന്ത്യ ആദ്യ സ്‌പെല്ലില്‍ ആരെയും നിലയുറപ്പിക്കാന്‍ അനുവദിച്ചില്ല. ക്ലാസ് ബാറ്റ്‌സ്മാന്‍ എന്റിച്ച് ക്ലാസനെയും പൂജ്യനായി മടക്കിയ ഇന്ത്യന്‍ നിര ഏകദിന മത്സരങ്ങളിലെ വിക്കറ്റ് കീപ്പറായിരുന്ന ഖയ സോണ്ടോയെയും (24 പന്തില്‍ 6) സുബേര്‍ ഹംസയെയും (30 പന്തില്‍ 13) വിയാന്‍ മള്‍ഡറിനെയും(43 പന്തുകളില്‍ 21) ഉച്ചഭക്ഷണത്തിനായി പിരിയുമ്പോഴേക്കും കൂടാരം കയറ്റി.
ഇന്ത്യക്കായി ഷാര്‍ദുല്‍ താക്കൂറും കൃഷ്ണപ്പ ഗൗതമും മൂന്ന് വിക്കറ്റ് വീതം നേടി. ഷഹബാസ് നദീം രണ്ടും മുഹമ്മദ് സിറാജ് ഒരു വിക്കറ്റും നേടി.
മറുപടി ബാറ്റിങ്ങിനിറങ്ങിയ ഇന്ത്യക്കായി ഋതുരാജ് ഗെയ്ക്വാദും(49 പന്തുകളില്‍ 30) ക്യാപ്റ്റന്‍ ശുഭ്മാന്‍ ഗില്ലും (108 പന്തുകളില്‍ 66 നോട്ടൗട്ട്) ചേര്‍ന്ന് മികച്ച തുടക്കം നല്‍കി.