ചെറുതുരുത്തി: ഗവ. ഹയര്‍ സെക്കന്‍ഡറി സ്‌കൂളില്‍ കഴിഞ്ഞ 22ന് നടന്ന സ്‌കൂള്‍ പാര്‍ലമെന്റ് തെരഞ്ഞെടുപ്പ് അട്ടിമറിച്ചു വീണ്ടും തെരഞ്ഞെടുപ്പു നടത്താനുള്ള പി.ടി.എയുടെയും ഒരു വിഭാഗം അധ്യാപകരുടെയും ശ്രമം ഹൈക്കോടതി തടഞ്ഞു.
തെരഞ്ഞെടുപ്പില്‍ ചെയര്‍മാനായി വിജയിച്ച പ്ലസ് വണ്‍ വിദ്യാര്‍ഥി പി.എം മുഹമ്മദ് ഷബീര്‍ നല്‍കിയ ഹരജിയിലാണു ഹൈക്കോടതി ഇടക്കാല ഉത്തരവ് നല്‍കിയത്. പൊതുവിദ്യാഭ്യാസ അഡീഷണല്‍ ഡയരക്ടറുടെ (ജനറല്‍) സര്‍ക്കുലര്‍ പ്രകാരം ഒക്ടോബര്‍ 22ന് സ്‌കൂളുകളില്‍ പാര്‍ലമെന്റ് തെരഞ്ഞെടുപ്പു നടത്തി വിജയികളെ പ്രഖ്യാപിച്ച് 24ന് ഭാരവാഹികളുടെ യോഗം ചേരണമെന്നു നിഷ്‌കര്‍ഷിച്ചിരുന്നു. 22ന് 58 ക്ലാസ്സ് ലീഡര്‍മാരുടെ തെരഞ്ഞെടുപ്പു പൂര്‍ത്തിയാക്കുകയും ഫലം പ്രഖ്യാപിക്കുകയും ചെയ്തു. 42 ക്ലാസ് ലീഡര്‍മാര്‍ പങ്കെടുത്ത സ്‌കൂള്‍ പാര്‍ലമെന്റിലേക്കുള്ള പത്തു ഭാരവാഹി സ്ഥാനങ്ങളിലേക്കു നടന്ന തെരഞ്ഞെടുപ്പ് ഇലക്ഷന്‍ ചുമതലയുള്ള പ്രധാനാധ്യാപകനും മറ്റു അധ്യാപകരും ചേര്‍ന്നാണു നടത്തിയത്. ചെയര്‍മാനെ ഓപ്പണ്‍ വോട്ടിങിലൂടെയും മറ്റു ഒന്‍പതു സ്ഥാനങ്ങളിലേക്കു രഹസ്യ ബാലറ്റ് വഴിയുമാണു തെരഞ്ഞെടുത്തത്. 25 വോട്ടുകള്‍ നേടിയ പി.എം മുഹമ്മദ് ഷബീറിനെ ചെയര്‍മാനായി പ്രഖ്യാപിക്കുകയും രഹസ്യ ബാലറ്റിലൂടെ നടന്ന ഒന്‍പതു സ്ഥാനങ്ങളിലേക്കുള്ള ഫലപ്രഖ്യാപനത്തില്‍ നാലു സ്ഥാനങ്ങളുടെ ഫലം എണ്ണുകയും ചെയ്തു. തുടര്‍ന്നു പരാജിത വിഭാഗം തെരഞ്ഞെടുപ്പു നടപടി ക്രമങ്ങള്‍ അലങ്കോലപ്പെടുത്തുകയും അധ്യാപകരെ ഭീഷണിപ്പെടുത്തി നടപടി ക്രമങ്ങള്‍ തടസപെടുത്തുകയും ചെയ്യുകയായിരുന്നു.
പി.ടി.എ ഭാരവാഹികളും ഇലക്ഷന്‍ ചുമതലയുള്ള അധ്യാപകരും ചേര്‍ന്നു തെരഞ്ഞെടുപ്പ് ഫലം പ്രഖ്യാപിക്കുന്നതിനു പകരം ഒക്ടോബര്‍ 26നു റീ ഇലക്ഷനുള്ള ശ്രമം നടത്തുകയായിരുന്നു. സ്‌കൂള്‍ ലീഡര്‍മാരെ വിളിച്ചുകൂട്ടി ജനാധിപത്യപരമായി നടന്ന തെരഞ്ഞെടുപ്പ് അട്ടിമറിക്കാനുള്ള ശ്രമത്തിനെതിരേ ചെയര്‍മാനായി തെരഞ്ഞെടുക്കപ്പെട്ട പി.എം മുഹമ്മദ് ഷബീര്‍ ഹൈകോടതിയെ സമീപിക്കുകയായിരുന്നു. പൊതു വിദ്യാഭ്യാസ അഡീഷണല്‍ ഡയരക്ട (ജനറല്‍)ന്റെ ഉത്തരവില്‍ പറഞ്ഞ പ്രകാരം ജനാധിപത്യ രീതിയില്‍ 22നു നടന്ന സ്‌കൂള്‍ പാര്‍ലമെന്റ് തെരഞ്ഞെടുപ്പിന്റെ ഫലപ്രഖ്യാപനം ഉടന്‍ നടത്തണമെന്നും എത്രയും വേഗം സ്‌കൂള്‍ പാര്‍ലമെന്റ് കൂടുന്നതിനു സൗകര്യമൊരുക്കണമെന്നും ആവശ്യപ്പെട്ടായിരുന്നു ഹരജി.
ഹൈക്കോടതിയുടെ അന്തിമ ഉത്തരവു വരുന്നതു വരെ 22ന് വോട്ടിങ് നടന്ന സ്‌കൂള്‍ പാര്‍ലമെന്റ് തെരഞ്ഞെടുപ്പ് റദ്ദു ചെയ്യുകയോ വീണ്ടും ഇലക്ഷന്‍ നടത്താന്‍ തീരുമാനിക്കുകയോ തെരഞ്ഞെടുപ്പ് സംബന്ധിച്ചു യാതൊരു വിധ തീരുമാനങ്ങളെടുക്കുകയോ ചെയ്യരുതെന്നാണ് ഹൈക്കോടതി തൃശൂര്‍ ജില്ലാ വിദ്യാഭ്യാസ ഡെപ്യൂട്ടി ഡയരക്ടറോടും സ്‌കൂള്‍ പ്രധാനധ്യപകനോടും നിര്‍ദേശിച്ചിട്ടുള്ളത്.