പുതുക്കാട്: ചെങ്ങാലൂര്‍ മറവാഞ്ചേരിയില്‍ നിയന്ത്രണം വിട്ട കാര്‍ ബസ് കാത്തിരിപ്പ് കേന്ദ്രത്തിലേക്ക് ഇടിച്ചു കയറി നാലു പേര്‍ക്കു പരുക്കേറ്റു.
ബസ് സ്റ്റോപ്പില്‍ ഇരിക്കുകയായിരുന്ന മറവാഞ്ചേരി കൊമ്പത്താന്‍ പ്രകാശന്‍,സ്‌നേഹപുരം പുത്തന്‍വീട്ടില്‍ സുധീര്‍, ഏറാട്ട് ഉണ്ണികൃഷ്ണന്‍, കാര്‍ യാത്രക്കാരനായ നന്തിപുലം ഞെരിഞ്ഞാംമ്പിള്ളി ബേബി എന്നിവര്‍ക്കാണു പരുക്കേറ്റത്. ഇന്നലെ ഉച്ചതിരിഞ്ഞു രണ്ടോടെയായിരുന്നു അപകടം.
നന്തിപുലം ഭാഗത്തേക്ക് പോയിരുന്ന കാര്‍ നിയന്ത്രണം വിട്ട് എതിര്‍ദിശയിലുള്ള ബസ് കാത്തിരിപ്പ് കേന്ദ്രത്തിലേക്ക് ഇടിച്ചു കയറുകയായിരുന്നു. ഇടിയുടെ അഘാതത്തില്‍ കാത്തിരിപ്പു കേന്ദ്രത്തിലെ സ്ലാബിനും കോണ്‍ക്രീറ്റ് തൂണിനും ഇടയില്‍പ്പെട്ടു പ്രകാശന്റെ കാലിനു ഗുരുതരമായി പരുക്കേറ്റു. പ്രകാശനെ തൃശൂരിലെ സ്വകാര്യ ആശുപത്രിയില്‍ പ്രവേശിപ്പിച്ചു.
മറ്റുള്ളവര്‍ തൃശൂര്‍ മെഡിക്കല്‍ കോളജ് ആശുപത്രിയിലും പുതുക്കാട് താലൂക്ക് ആശുപത്രിയിലും പ്രവേശിപ്പിച്ചു. അപകടത്തില്‍ ബസ് കാത്തിരിപ്പ് കേന്ദ്രത്തിലെ ഇരിപ്പിടം തകര്‍ന്നു.