അശ്‌റഫ് കൊണ്ടോട്ടി
കൊണ്ടോട്ടി: ഉംറ വിസക്കുള്ള നിരക്ക് സഊദി വീണ്ടും ഉയര്‍ത്തി. ഇന്നലെ മുതല്‍ 300 റിയാല്‍ (6,000 രൂപ) ആണ് ഒറ്റയടിക്ക് വര്‍ധിപ്പിച്ചത്. കഴിഞ്ഞ തവണ 3,000 രൂപയോളം ഈടാക്കിയിരുന്ന ഉംറ വിസക്കുള്ള തുക ഈ സീസണില്‍ 8,000 രൂപയാക്കി ഉയര്‍ത്തിയിരുന്നു. കൂടാതെ കടുത്ത ചില നിബന്ധനകളും ഏര്‍പ്പെടുത്തിയിരുന്നു. ഇതിന് പിന്നാലെയാണ് ഇന്നലെമുതല്‍ 300 റിയാല്‍ കൂടി വര്‍ധന വരുത്തിയത്. ഇതോടെ വിസ നിരക്ക് 14,000 രൂപയോളമായി. ഉംറ സീസണ്‍ ആരംഭിക്കുന്ന മുഹറം ഒന്നിന് വര്‍ധിപ്പിച്ച തുക ഇന്നലെ വീണ്ടും കൂട്ടിയതോടെ ഒരാഴ്ചക്കിടെ 11,000 രൂപയോളമാണ് വര്‍ധന.
വിസ നിരക്ക് ഉയര്‍ത്തിയതോടെ ഈ വര്‍ഷത്തെ തീര്‍ഥാടനത്തിന് ചെലവ് വീണ്ടും ഉയരും. കഴിഞ്ഞ ദിവസം വരെ 59,000 മുതല്‍ 63,000 വരെയായിരുന്നു കേരളത്തില്‍നിന്ന് പുറപ്പെട്ടവരുടെ ഉംറ ചെലവ്. ഇനിമുതല്‍ ഇത് 65,000 മുതല്‍ 69,000 രൂപ വരെയായി വര്‍ധിക്കും. ഓരോ തീര്‍ഥാടകന്റെയും താമസത്തിനുള്ള ഹോട്ടലിന്റെയും മക്കയിലും മദീനയിലും സഞ്ചരിക്കേണ്ട വാഹനത്തിന്റെയും നിരക്കുകള്‍ മുന്‍കൂട്ടി മുഴുവന്‍ അടച്ചാല്‍ മാത്രമെ ഈ സീസണ്‍ മുതല്‍ ഉംറ വിസ അനുവദിക്കുന്നുള്ളൂ. ഇതിനൊപ്പം വിമാന ടിക്കറ്റ് നിരക്കും ഉയരുന്നതോടെ തീര്‍ഥാടനത്തിന് ചെലവ് കുത്തനെ വീണ്ടും കൂടും.
അതിനിടെ, മൂന്ന് വര്‍ഷത്തിനിടെ വീണ്ടും ഉംറക്ക് പോകുന്നവര്‍ നല്‍കേണ്ടിയിരുന്ന അധിക തുക 2,000 റിയാലില്‍ (ഏകദേശം 40,000 രൂപ)നിന്ന് മുന്നൂറ് റിയാല്‍(ഏക ദേശം 6000 രൂപ)ആക്കി കുറച്ചിട്ടുമുണ്ട്. നിബന്ധനകള്‍ ഇന്നലെ മുതലാണ് പ്രാബല്യത്തില്‍ വന്നത്. ഉംറ കമ്പനികള്‍ക്ക് മാത്രമായി സഊദി ഗവണ്‍മെന്റ് ഏര്‍പ്പെടുത്തിയ പ്രത്യേക ബാങ്കിങ് സംവിധാനം വഴിയാണ് ഈവര്‍ഷം ഉംറക്കുള്ള പണം അടക്കേണ്ടത്. ബന്ധുക്കളുടെ കൂടെ താമസിക്കാനുദ്ദേശിക്കുന്നവര്‍ക്കും ഹോട്ടല്‍ താമസസ്ഥലത്തിന് മുന്‍കൂട്ടി പണം അടക്കേണ്ടിവരുന്നുണ്ട്. സഊദി സര്‍ക്കാരിന്റെ അംഗീകാരമുള്ള ട്രാവല്‍ ഏജന്‍സികള്‍ക്ക് മാത്രമാണ് പുതിയ സംവിധാനത്തില്‍ ഉംറ തീര്‍ഥാടകരെ കൊണ്ടുപോകാന്‍ കഴിയുക. നിരക്ക് വര്‍ധനയ്‌ക്കൊപ്പം പുതിയ നിമയങ്ങളും നിബന്ധനകളും വന്നത് മുന്‍കൂട്ടി ഗ്രൂപ്പ് ടിക്കറ്റ് എടുത്തുവച്ച ട്രാവല്‍ ഏജന്‍സികള്‍ക്കും കനത്ത തിരിച്ചടിയായിട്ടുണ്ട്.