തിരുവനന്തപുരം: പാല്‍വില ലിറ്ററിന് നാല് രൂപ വര്‍ധിപ്പിക്കുന്നതിനൊപ്പം മില്‍മ കവറിന്റെ ഡിസൈനിലും മാറ്റം വരുത്തുന്നു. പുതിയ വില പ്രിന്റ് ചെയ്യുന്നതിനൊപ്പം ആകര്‍ഷകമായ പുതിയ ഡിസൈനും സ്വീകരിക്കാനാണ് ആലോചന. പുതിയ ഡിസൈനിനെപ്പറ്റി ഈ മാസം 16 ന് ചേരുന്ന ഡയരക്ടര്‍ ബോര്‍ഡ് യോഗം തീരുമാനമെടുക്കും.
കഴിഞ്ഞ വര്‍ഷം നവംബറിലും മില്‍മ മാറ്റംവരുത്തിയ കവര്‍ ഡിസൈനുകള്‍ പ്രകാശനം ചെയ്തിരുന്നു. പുതിയ വില നിലവില്‍ വരുന്ന ഈ മാസം 21 മുതല്‍ തന്നെ പുതിയ ഡിസൈനും രംഗത്തിറക്കാനാണ് ആലോചിക്കുന്നത്. ഓണം പ്രമാണിച്ച് കൂടുതല്‍ അളവില്‍ പാല്‍ വിപണിയിലെത്തിക്കാനുള്ള ഒരുക്കങ്ങളും പൂര്‍ത്തിയായിട്ടുണ്ട്. ഉത്രാടം ദിനമായ ഇന്ന് 25 ലക്ഷം ലിറ്ററും തിരുവോണത്തിന് 20 ലക്ഷം ലിറ്റര്‍ പാലുമാണ് മില്‍മ വിപണിയിലെത്തിക്കുക.