പെരിന്തല്‍മണ്ണ: അമ്മിനിക്കാട് വളാംകുളത്ത് കോഴിമാലിന്യം തള്ളിയതിനാല്‍ നാട്ടുകാര്‍ ദുരിതത്തിലായി. ഇന്നലെയാണ് പ്രദേശത്ത് വന്‍തോതില്‍ മാലിന്യം തള്ളിയത്. സ്വകാര്യ വ്യക്തിയുടെ സ്ഥലത്ത് മൂന്ന് ലോഡോളം കോഴി മാലിന്യമാണ് തള്ളിയത്. സംഭവത്തെതുടര്‍ന്ന് പ്രദേശത്ത് അസഹ്യമായ ദുര്‍ഗന്ധം അനുഭവപ്പെടുന്നുണ്ട്.
മാലിന്യം ജലസ്രോതസുകളില്‍ പടരുമെന്ന ആശങ്കയിലാണ് നാട്ടുകാര്‍. താഴെക്കോട്, ആലിപ്പറമ്പ് പഞ്ചായത്തുകളുടെ അതിര്‍ത്തി പ്രദേശത്താണ് മാലിന്യം തള്ളിയിരിക്കുന്നത്. മാലിന്യം ജെ.സി.ബി ഉപയോഗിച്ച് മണ്ണിട്ട് മൂടി. ആളൊഴിഞ്ഞ പ്രദേശമായതിനാല്‍ പ്രദേശത്ത് മാലിന്യം തള്ളല്‍ പതിവാണ്.