മനുഷ്യസഹജമായി വന്നുപോകുന്ന തെറ്റുകളെ കഴുകിക്കളയാനുള്ള സുന്ദരാവസരമാണ് വിടചോദിക്കുന്നത്. റബ്ബിന്റെ സവിധത്തിലെത്തുംമുന്‍പു പാപങ്ങളെല്ലാം പൊറുക്കപ്പെടണം. തെറ്റുകള്‍ സംഭവിച്ചുപോയെന്നതു എല്ലാ കാലത്തും കുറ്റക്കാരനായി തുടരാനല്ല, വന്നുപോയതിലുള്ള പശ്ചാത്താപ ചിന്തയും ഇനി തെറ്റിലേക്കില്ലെന്ന കളങ്കമില്ലാത്ത നിലപാടുമാണ് അടിമയെ അല്ലാഹുവിലേക്കടുപ്പിക്കുന്നത്.

അല്ലാഹുവിലേക്കടുക്കുന്ന പല മഹത്തുക്കളുടെയും ചരിത്രം പരിശോധിച്ചാല്‍ പാപങ്ങള്‍ നിറഞ്ഞ കാലങ്ങള്‍ കാണാനാകും. പക്ഷേ, തെറ്റില്‍നിന്നു പിന്മാറാനുള്ള സന്മനസും ചെയ്തുപോയതിലുള്ള മനസറിഞ്ഞ വേദനയും അവരെ നന്മയിലേക്കെത്തിച്ചു. ഈ റമദാന്‍ നമുക്കു നന്നാകാനുള്ളതായിരിക്കണം. എന്നെ നന്മയിലേക്കു നയിക്കുന്നതിന് അല്ലാഹു തന്ന പരിശുദ്ധ സമയം വിടപറയുകയാണല്ലോ എന്ന ചിന്ത അലട്ടിക്കൊണ്ടിരിക്കണം. ജീവിതത്തിന്റെ ദുര്‍ബല സാഹചര്യങ്ങളില്‍ വന്നുപോയ ദുശ്‌ചെയ്തികളോടു വെറുപ്പും നന്മകള്‍ കൂടുതല്‍ ചെയ്യാനുള്ള ആവേശവും ഹൃദയത്തില്‍ നിറഞ്ഞുവരണം.
അല്ലാഹുവിന്റെ മുന്നില്‍ നില്‍ക്കുന്നതോര്‍ത്തു മനസ് വേദനിക്കണം. കണ്ണുകള്‍ നിറയണം. ഇബ്‌നു അബ്ബാസ് (റ)പറയുന്നു: 'സൂറത്തു തഹ്‌രീമിലെ ആറാം സൂക്തം (നരകത്തില്‍ കാണിക്കപ്പെടുന്നതു കല്ലുകളും മനുഷ്യരുമാണ്) അവതരിക്കപ്പെട്ടപ്പോള്‍ നബി(സ)സ്വഹാബത്തിനെ ഓതിക്കേള്‍പ്പിച്ചു. തത്സമയം സദസില്‍നിന്നൊരാള്‍ ബോധം നഷ്ടപ്പെട്ടു വീണു. അദ്ദേഹത്തിന്റെ ഹൃദയഭാഗത്തു നബി തങ്ങള്‍ കൈ വച്ചുനോക്കി. ചെറിയ ഹൃദയമിടിപ്പ് ബാക്കിയുണ്ട്. അദ്ദേഹത്തിനു നബി തങ്ങള്‍ കലിമ ചൊല്ലിക്കൊടുക്കുകയും അദ്ദേഹമത് ഏറ്റുചൊല്ലുകയും മരണപ്പെടുകയും ചെയ്തു. അദ്ദേഹം സ്വര്‍ഗത്തിലാണെന്ന് നബി തങ്ങള്‍ പറഞ്ഞപ്പോള്‍ 'അദ്ദേഹത്തിനു മാത്രമുള്ളതാണോ, ഇതു ഞങ്ങള്‍ക്കുണ്ടോ' എന്ന സ്വഹാബത്തിന്റെ ചോദ്യത്തിനു വിശുദ്ധ ഖുര്‍ആനിലെ സൂറത്ത് ഇബ്രാഹീമിലെ 14ാം സൂക്തമായിരുന്നു നബി തങ്ങള്‍ പറഞ്ഞ മറുപടി- 'എന്റെ മഖാമിനെ ഭയപ്പെടുന്നവര്‍ക്കുള്ളതാണ് സ്വര്‍ഗം'.
അല്ലാഹു തനിക്കു നല്‍കുന്നതിലും മറ്റുള്ളവര്‍ക്കു നല്‍കുന്നതിലും പൂര്‍ണമായും സന്തോഷിക്കാന്‍ കഴിയണം. മറ്റുള്ളവരുടെ സന്തോഷത്തില്‍ വിഷമവും അവരുടെ വിഷമത്തില്‍ സന്തോഷവും എന്ന നിലപാട് മനുഷ്യനെ നശിപ്പിക്കുകയാണ്. അടുത്തു കഴിയേണ്ട കുടുംബങ്ങളും അയല്‍ക്കാരും അകന്നുകഴിയുന്നത് ഇന്നത്തെ പ്രവണതയാണ്. കുടുംബ ബന്ധവും അയല്‍ ബന്ധങ്ങളും ഏറെ സ്‌നേഹത്തോടെ നിലനില്‍ക്കണം. പിണങ്ങിക്കഴിയുന്നവരൊക്കെ ഇണങ്ങാന്‍ തയാറാകണം. ഖല്‍ബില്‍നിന്നു വലിച്ചെറിഞ്ഞ സ്‌നേഹങ്ങല്‍ തിരികെ കൊണ്ടുവരണം. നിലനില്‍ക്കുന്ന ബന്ധങ്ങളെ തച്ചുടക്കുന്നതിനുള്ള പൈശാചിക പ്രവര്‍ത്തനങ്ങളോട് രാജിയാകണം. അല്ലാഹുവിനുവേണ്ടി സ്‌നേഹിക്കുക, അല്ലാഹുവിനുവേണ്ടി വെറുക്കുക, പുണ്യ റമദാനിലെ ഇനിയുള്ള സമയങ്ങളെ സമ്പൂര്‍ണമായി ഉപയോഗപ്പെടുത്തുക,
(എസ്.വൈ.എസ് സംസ്ഥാന ട്രഷററാണ് ലേഖകന്‍)