ഇരിട്ടി: കാട്ടാന ഭീതിയില്‍ നീറുന്ന ആറളം ഫാമില്‍ ജനവാസ കേന്ദ്രത്തില്‍ വീണ്ടും കാട്ടാനയിറങ്ങി. ഇന്നലെ രാവിലെ ഏഴോടെയാണ് ആറളം ഫാമിനടുത്ത് പുഴക്കര ഭാഗത്തു കാട്ടാനയിറങ്ങി ഭീതി പടര്‍ത്തിയത്. കനത്ത മഴയുള്ളതിനാലും പ്രദേശത്ത് കാര്‍ഷിക വിളകള്‍ കുറവായതിനാലും നാശനഷ്ടവും അപകടവും ഉണ്ടായില്ല. സംഭവമറിഞ്ഞു കൊട്ടിയൂര്‍ ഫോറസ്റ്റ് റേഞ്ച് ഓഫിസറും സംഘവും എത്തി കാട്ടാനയെ വനത്തിലേക്ക് തുരത്തി. റേഞ്ച് ഓഫിസര്‍ ടി. രതീഷന്‍, മറ്റ് ഉദ്യോഗസ്ഥരായ മസ്ദൂര്‍, വിജിത്ത്, എം. രാജന്‍, ഷാജഹാന്‍, മുരളീധരന്‍ എന്നിവരും ഒപ്പമുണ്ടായിരുന്നു.