തിരുവനന്തപുരം: കുട്ടികള്‍ക്കിടയിലെ ജങ്ക് ഫുഡ് ഉപയോഗം കുറയ്ക്കുന്നതിന് എല്ലാ സ്‌കൂളുകളിലും ഫുഡ് സേഫ്റ്റി ക്ലബുകള്‍ രൂപീകരിക്കണമെന്ന് സംസ്ഥാന ബാലാവകാശ സംരക്ഷണ കമ്മിഷന്‍ ഉത്തരവിട്ടു. കുട്ടികളുടെ ഇടയില്‍ ജങ്ക് ഫുഡ് ഉപയോഗം കൂടുന്നതിനാല്‍ കേരളത്തില്‍ ഇവയുടെ ഉല്‍പാദനം നിരോധിക്കണമെന്നാവശ്യപ്പെട്ട് കളമശേരി മീഡിയ റിസര്‍ച്ച് ഫൗണ്ടേഷന്‍ ചെയര്‍മാന്‍ പ്രീത് തോമസ് തുരുത്തിപ്പള്ളി നല്‍കിയ പരാതിയിലാണ് കമ്മിഷന്‍ ഉത്തരവിട്ടത്.
ഇവയുടെ ഉല്‍പാദന വിതരണ കേന്ദ്രങ്ങളില്‍ സംസ്ഥാന ഭക്ഷ്യ സുരക്ഷാവിഭാഗം പരിശോധന നടത്തി നിയമലംഘകര്‍ക്കെതിരേ ശിക്ഷാനടപടി സ്വീകരിക്കണമെന്നും ജങ്ക് ഫുഡ് ഉപേക്ഷിക്കുന്നതിന് കുട്ടികളിലും പൊതുസമൂഹത്തിലും നിരന്തരമായ പ്രചാരണ പരിപാടികള്‍ സംഘടിപ്പിക്കണമെന്നും കമ്മിഷന്‍ നിര്‍ദേശിച്ചു.