ബാലുശ്ശേരി: പകര്‍ച്ചപ്പനിയും ഡങ്കിപ്പനിയും പടര്‍ന്നു പിടിച്ചുകൊണ്ടിരിക്കുന്ന നെന്മണ്ട പഞ്ചായത്തില്‍ കൊതുകുകളുടെ നശീകരണത്തിന് ആരോഗ്യ പ്രവര്‍ത്തകര്‍ക്കൊപ്പം വിദ്യാര്‍ഥികളും പങ്കാളികളായി. 

കൊളത്തൂര്‍ ഗവ.ഹൈസ്‌ക്കൂള്‍ എന്‍.എസ്.എസ്,നന്മണ്ട ഹയര്‍ സെക്കന്‍ഡറി സ്‌ക്കൂള്‍ എസ്.പി.സി, എന്‍.സി.സി, എന്‍.എസ്.എസ് എന്നിവയുടെ സംയുക്താഭിമുഖ്യത്തിലാണ് വിദ്യാര്‍ഥികള്‍ സേവന രംഗത്തിറങ്ങിയത്. കൊതുകു നശീകരണ യജ്ഞം പഞ്ചായത്ത് പ്രസിഡന്റ് കുണ്ടൂര്‍ ബിജു ഉദ്ഘാടനം ചെയ്തു.
പനി ബാധിത പ്രദേശങ്ങളിലെ മുഴുവന്‍ വീടുകളിലും കൊതുകുകളെ നശിപ്പിക്കലും മറ്റു സുരക്ഷാ പ്രവര്‍ത്തനങ്ങളും നടത്തി. ഹെല്‍ത്ത് ഇന്‍സ്‌പെക്ടര്‍മാര്‍, ജെ.പി.എന്‍, ആശാ വര്‍ക്കര്‍മാര്‍ എന്നിവരുടെ നേതൃത്വത്തിലായിരുന്നു കൊതുകു നശീകരണ പ്രവര്‍ത്തനം.