ശ്രീകണ്ഠപുരം: കഞ്ചാവ് കൈവശം വച്ചതിനും കഞ്ചാവ് ചെടികള്‍ നട്ടുവളര്‍ത്തിയതിനും മധ്യവയസ്‌കന്‍ അറസ്റ്റില്‍. ഐച്ചേരി ചെരിക്കോട് തലയ്ക്കല്‍ ഫിലിപ്പിനെ(60)യാണ് ശ്രീകണ്ഠപുരം എക്‌സൈസ് ഇന്‍സ്‌പെക്ടര്‍ സി.സി ആനന്ദകുമാറും സംഘവും പിടികൂടിയത്.
വര്‍ഷങ്ങളായി കഞ്ചാവ് ഉപയോഗിക്കുകയും വില്‍പന നടത്തുകയും ചെയ്തുവരികയായിരുന്ന ഇയാളെ രഹസ്യവിവരത്തിന്റെ അടിസ്ഥാനത്തിലാണ് പിടികൂടിയത്. വീട്ടിലെ പച്ചക്കറി തോട്ടത്തിനിടയില്‍ പ്ലാസ്റ്റിക് ചാക്കുകളിലാക്കി കഞ്ചാവ് വിത്തുകള്‍ പാകി മുളപ്പിച്ച നിലയിലായിരുന്നു.
ഒരടി മുതല്‍ മൂന്നടി വരെ ഉയരത്തില്‍ വളര്‍ന്ന ആറ് കഞ്ചാവ് ചെടികള്‍ എക്‌സൈസ് സംഘം കണ്ടെത്തി.പരിശോധനയില്‍ പ്രതിയുടെ വസ്ത്രത്തിനുള്ളില്‍ ഒളിപ്പിച്ച നിലയില്‍ 30 ഗ്രാം കഞ്ചാവും പിടിച്ചെടുത്തു. അസി.എക്‌സൈസ് ഇന്‍സ്‌പെക്ടര്‍ രഞ്ജിത് ബാബു, ഇ.ഡി ജോസഫ്, സിവില്‍ എക്‌സൈസ് ഓഫിസര്‍മാരായ എം.വി അശ്രഫ്, വി.വി പ്രകാശന്‍, പി ഷിബു, ടി.വി ഉജേഷ്, കെ.കെ കൃഷണന്‍, കെ സന്തോഷ് കുമാര്‍ എന്നിവരും സംഘത്തിലുണ്ടായിരുന്നു. പ്രതിയെ ഇന്ന് കോടതിയില്‍ ഹാജരാക്കും.