കൊയിലാണ്ടി: സ്വകാര്യബസില്‍ സ്ത്രീയുടെ കഴുത്തില്‍നിന്ന് മൂന്നര പവന്‍ വരുന്ന സ്വര്‍ണമാല കവര്‍ന്ന സംഭവത്തില്‍ രണ്ട് ഇതരസംസ്ഥാന സ്ത്രീകളെ പൊലിസ് പിടികൂടി. മധുര അയ്യര്‍ ബംഗ്ലപിള്ളയാരപ്പന്‍ കോവില്‍ മീന, മാലതി എന്നിവരെയാണു പിടികൂടിയത്. കൊയിലാണ്ടിയില്‍ നിന്ന് നടുവണ്ണൂരിലേക്ക് പോകുകയായിരുന്ന ബസില്‍ യാത്ര ചെയ്യവെ നടുവത്തൂര്‍ ഓണോത്ത്കണ്ടി ജാനുവിന്റെ കഴുത്തില്‍ നിന്നാണ് സ്വര്‍ണമാല മോഷ്ടിച്ചത്. ഇക്കഴിഞ്ഞ 12നാണ് സംഭവം.
പ്രതികളെ കസ്റ്റഡിയില്‍ വാങ്ങിയ ശേഷം ബസിലും ബസ് സ്റ്റാന്‍ഡ് പരിസരത്തും കൊണ്ടുപോയി തെളിവെടുപ്പ് നടത്തി. എസ്.ഐ ഫസലുല്‍ ആബിദ്, എ.എസ്.ഐ പി. രമേശന്‍, വനിതാ സിവില്‍ പൊലിസ് ഓഫിസര്‍, രചന, ഒ.കെ സുരേഷ് തുടങ്ങിയവരാണ് കേസ് അന്വേഷിച്ചത്.