ന്യൂയോര്‍ക്ക്: അമേരിക്കയില്‍ നടന്ന അന്താരാഷ്ട്ര സൗഹൃദ മത്സരത്തില്‍ അര്‍ജന്റീന തല ഉയര്‍ത്തിയപ്പോള്‍ തല താഴ്ത്തി ബ്രസീല്‍. മെക്‌സിക്കോയെ എതിരില്ലാത്ത നാലു ഗോളുകള്‍ക്ക് പരാജയപ്പെടുത്തിയാണ് അര്‍ജന്റീന വിജയഗാഥ രചിച്ചതെങ്കില്‍ പെറുവിനോട് 1-0ന്റെ നാണംകെട്ട തോല്‍വിയോടെയാണ് ബ്രസീല്‍ ബൂട്ടഴിച്ചത്. ഇന്റര്‍ മുന്നേറ്റ താരം ലൗറ്റാറോ മാര്‍ട്ടിനസിന്റെ ഹാട്രിക് ഗോള്‍നേട്ടമാണ് അര്‍ജന്റീനയ്ക്ക് മികച്ച ജയം സമ്മാനിച്ചത്. പെനാല്‍റ്റിയിലൂടെ ലിയാന്‍ഡ്രോ പാരഡസും ഗോള്‍ നേടി.
ബാഴ്‌സയുമായി കരാറിലേര്‍പ്പെടാത്തതോടെ ടീമില്‍ തിരിച്ചെത്തിയ നെയ്മറിനെ പകരക്കാരനായി ഇറക്കിയെങ്കിലും താരത്തിന് ബ്രസീലിനെ രക്ഷിക്കാനായില്ല. കോപ അമേരിക്കയിലേറ്റ തോല്‍വിക്ക് പകരം വീട്ടിയാണ് പെറു കളി അവസാനിപ്പിച്ചത്.