ചേലേമ്പ്ര (മലപ്പുറം): സുബ്രതോ കപ്പില്‍ കേരള അണ്ടര്‍ 17 ആണ്‍കുട്ടികളെ പ്രതിനിധീകരിച്ച് പങ്കെടുത്ത ചേലേമ്പ്ര എന്‍.എന്‍.എം.എച്ച്.എസ് സ്‌കൂള്‍ പുറത്തായി. പൂള്‍ ഇയിലെ അവസാന മത്സരത്തില്‍ ബംഗ്ലാദേശ് എയര്‍ഫോഴ്‌സ് ടീമിനെ 6 -1ന് തകര്‍ത്തിട്ടും ടീം പുറത്താവുകയായിരുന്നു. പൂള്‍ ഇയിലെ എല്ലാ മത്സരങ്ങളും പൂര്‍ത്തിയായപ്പോള്‍ കേരളവും മിസോറമും തുല്യ പോയിന്റുകള്‍ നേടി ഗ്രൂപ്പില്‍ ഒന്നാമതായിരുന്നു. എന്നാല്‍ ഗോള്‍ ശരാശരിയുടെ പിന്‍ബലത്തില്‍ മിസോറം കേരളത്തെ പിന്തള്ളുകയായിരുന്നു.
ബംഗ്ലാദേശിനെതിരായ അവസാന മത്സരത്തില്‍ വന്‍ ഗോള്‍ ശരാശരിയില്‍ ജയം അനിവാര്യമായിരുന്ന കേരളം മികച്ച കളി തന്നെ പുറത്തെടുത്തു. മികച്ച മുന്നേറ്റങ്ങളൊന്നും ഗോളാക്കി മാറ്റാന്‍ സാധിക്കാത്തതാണ് കേരളത്തിന് വിനയായത്.
ആദ്യ മത്സരത്തില്‍ മിസോറമുമായി ഗോള്‍രഹിത സമനിലയില്‍ പിരിഞ്ഞ കേരളം രണ്ടാം മത്സരത്തില്‍ ഐ.ബി.എസ്.ഒ ഡല്‍ഹിയെ 12-3ന് തകര്‍ത്തു. മൂന്നാം മത്സരത്തില്‍ കരുത്തരായ വെസ്റ്റ് ബംഗാളിനെ 3-0ന് പരാജയപ്പെടുത്തിയതോടെ പ്ലേ ഓഫ് സാധ്യത വര്‍ധിപ്പിച്ചു. എന്നാല്‍ അവസാന മത്സരത്തില്‍ ഗോള്‍മഴ പെയ്യിച്ചെങ്കിലും അത് മാത്രം മതിയായിരുന്നില്ല.