കോവളം: വിദേശികളടക്കമുള്ളവരെ ലക്ഷ്യമിട്ട് ഒരു കോടിയുടെ ഹഷീഷ് ഓയിലുമായി എത്തിയ യുവാവ് വിഴിഞ്ഞം പൊലിസിന്റെ പിടിയിലായി.
പെരുമ്പാവൂര്‍ വേങ്ങൂര്‍ വെസ്റ്റ്‌വില്ലേജില്‍ ഇലകമ്പകപുലി ത്രിവേണി കവലയില്‍ വിഷ്ണുരാജ് (26) ആണ് പിടിയിലായത്. സ്‌കൂള്‍ കോളജ് കുട്ടികളുടെയിടയില്‍ കഞ്ചാവിന്റേയും മയക്കുമരുന്നിന്റെയും ഉപയോഗം ശ്രദ്ധയില്‍ പെട്ടതിനെത്തുടര്‍ന്ന് സിറ്റി പൊലിസ് കമ്മിഷണര്‍ പി. പ്രകാശ് രൂപീകരിച്ച പ്രത്യേക ഷാഡോ പൊലിസും വിഴിഞ്ഞം പൊലിസും ചേര്‍ന്ന് ദിവസങ്ങളോളം നടത്തിയ അന്വേഷണത്തിലൊടുവിലാണ് മയക്കുമരുന്ന് സംഘത്തിലെ അംഗമായ വിഷ്ണു രാജ് പിടിയിലായത്.
അന്താരാഷ്ടാ മാര്‍ക്കറ്റില്‍ ഒരു കോടി രൂപയോളം വില മതിക്കുന്ന 600 ഗ്രാം ഹാഷീഷ് ഓയില്‍ ആണ് ഇയാളില്‍ നിന്നും കണ്ടെടുത്തതെന്നും വിഴിഞ്ഞം കല്ലുവെട്ടാംകുഴി പാലത്തിനു സമീപത്ത് ഇടപാടുകാരനെ കാത്ത് നില്‍ക്കുന്നതിനിടയില്‍ ആണ് പ്രതിപിടിയിലായതെന്നും പൊലിസ് പറഞ്ഞു.
വിഴിഞ്ഞം സി.ഐ ബൈജു എല്‍.എസ്, എസ്.ഐ ഗോപകുമാര്‍ സി.പി.ഒ അജിത് എന്നിവരുടെ നേതൃത്വത്തിലുള്ള സംഘമാണ് പ്രതിയെ പിടികൂടിയത്.
കോടതിയില്‍ ഹാജറാക്കിയെപ്രതിയെ റിമാന്‍ഡ് ചെയ്തു.