മാനന്തവാടി: കാലവര്‍ഷം കനത്തതോടെ ജില്ലയിലെ പ്രധാന വിനോദസഞ്ചാര കേന്ദ്രമായ കുറുവാ ദ്വീപില്‍ സഞ്ചാരികള്‍ക്ക് നിരോധനം ഏര്‍പ്പെടുത്തി. പ്രധാന പ്രവേശന കവാടമായ പാല്‍വെളിച്ചം വഴി ഈ സീസണില്‍ 2016 നവംബര്‍ ഒന്നു മുതല്‍ 2017 ജൂണ്‍ 11 വരെ 467 വിദേശ വിനോദ സഞ്ചാരികള്‍ ഉള്‍പ്പെടെ 2,64475 പേരാണ് ദ്വീപ് സന്ദര്‍ശിച്ചത്.
പാക്കം ചെറിയ മലവഴി പ്രവേശിക്കുന്നവരുടെ എണ്ണവും കൂട്ടുമ്പോള്‍ ഇത് മൂന്ന് ലക്ഷത്തോളമാകും. ഈ സീസണില്‍ വരുമാന ഇനത്തില്‍ 7948260 രൂപയും ലഭിച്ചു. കഴിഞ്ഞ സീസണില്‍ 2015 നവംബര്‍ മുതല്‍ 2016 ജൂണ്‍ വരെ 756 വിദേശ വിനോദസഞ്ചാരികള്‍ ഉള്‍പ്പെടെ 2,34,756 പേര്‍ ദ്വീപ് സന്ദര്‍ശിക്കുകയും ഫീസിനത്തില്‍ 7,07,5260 രൂപ ലഭിക്കുകയും ചെയ്തു. ഈ സീസണില്‍ ക്രിസ്തുമസ് അവധിക്കാലത്താണ് ഏറ്റവും കൂടുതല്‍ ആളുകള്‍ ദ്വീപ് സന്ദര്‍ശിച്ചത്. 70 വിദേശികള്‍ ഉള്‍പ്പെടെ 49,981 പേര്‍ ദ്വീപിലെത്തുകയും 1,50,1530 രൂപ വരുമാനമായി ലഭിക്കുകയും ചെയ്തപ്പോള്‍ മധ്യവേനലവധിക്കാലമായ മെയ് മാസം 14 വിദേശികള്‍ ഉള്‍പ്പെടെ 46,698പേര്‍ ഇവിടം സന്ദര്‍ശിക്കുകയും 1,40,1360 രൂപ സര്‍ക്കാര്‍ ഖജനാവിലേക്ക് മുതല്‍കൂട്ടാവുകയും ചെയ്തു.
ചങ്ങാടയാത്ര ഉള്‍പ്പെടെ വിദേശികള്‍ക്ക് 150 രൂപയും മറ്റുള്ളവര്‍ക്ക് 80 രൂപയുമാണ് പ്രവേശന ഫീസായി ഈടാക്കുന്നത്. കാമറ ഉപയോഗിക്കുന്നതിന് പ്രത്യേക ചാര്‍ജും നല്‍കണം. സഞ്ചാരികളെ ദ്വീപിലെക്കെത്തിക്കുന്നതിന് 70 പേര്‍ക്ക് വീതം യാത്ര ചെയ്യാന്‍ കഴിയുന്ന രണ്ട് ചങ്ങാടങ്ങളും ഇപ്പോള്‍ ഇവിടെയുണ്ട്. മുന്‍പ് ബോട്ടുകളിലായിരുന്നു സഞ്ചാരികളെ ദ്വീപിലെത്തിച്ചിരുന്നത്.
എന്നാല്‍ പലവിധ സുരക്ഷാകാരണങ്ങളാലും ബോട്ടില്‍ കുടുതല്‍ പേര്‍ക്ക് യാത്ര ചെയ്യാന്‍ കഴിയാത്തതിനാലും ബോട്ട് യാത്ര ഉപേക്ഷിക്കുകയായിരുന്നു. സൗത്ത് വയനാട് വനം ഡിവിഷന് കീഴില്‍ 900 ഹെക്ടറില്‍ വ്യാപിച്ച് കിടക്കുന്ന കുറുവാ ദ്വീപ് അപൂര്‍വ്വ ഇനത്തില്‍പ്പെട്ട ഔഷധ സസ്യങ്ങളുടെ പ്രധാന മേഖല കൂടിയാണ്. കാനഭംഗി നുകര്‍ന്ന് കൊണ്ടുള്ള കാല്‍നടയാത്രയും ദ്വീപിലെ പുഴയിലെ കുളിയുമെല്ലാമാണ് അന്യസംസ്ഥാനങ്ങളില്‍ നിന്നുള്ള വിനോദസഞ്ചാരികള്‍ ഉള്‍പ്പെടെ ആയിരകണക്കിന് ആളുകളെ ദ്വീപിലേക്ക് ആകര്‍ഷിക്കുന്നത്. ഒന്‍പത് ഡി.ടി.പി.സി ജീവനക്കാരടക്കം 20 പേരാണ് ഇവിടെ ജോലി ചെയ്യുന്നത്. അനുദിനം സഞ്ചാരികളുടെ എണ്ണം വര്‍ധിക്കുകയും ജില്ലയിലെ പ്രധാന വിനോദ സഞ്ചാര കേന്ദ്രങ്ങളിലൊന്നായി മാറികൊണ്ടിരിക്കുകയും ചെയ്യുന്ന ദ്വീപില്‍ സഞ്ചാരികള്‍ക്കായി കൂടുതല്‍ സൗകര്യങ്ങള്‍ ഏര്‍പ്പെടുത്തണമെന്നാണ് ആവശ്യം ഉയരുന്നത്.