കൊച്ചി: മരടിലെ ഫ്ളാറ്റുടമകളുടെ സങ്കടം കേള്‍ക്കാന്‍ പ്രതിപക്ഷ നേതാവ് രമേശ് ചെന്നിത്തലയും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണനും എത്തി. തങ്ങളുടേതല്ലാത്ത കുറ്റത്തിന് ഫ്‌ളാറ്റ് പൊളിച്ചു നീക്കാനുള്ള സാഹചര്യത്തില്‍ സര്‍ക്കാരിന്റെ അടിയന്തര ഇടപെടല്‍ ഉണ്ടാകണമെന്നാണ് ഫ്‌ളാറ്റുടമകള്‍ ഇവരോട് ബോധിപ്പിച്ചത്. എല്ലാം കേട്ട ശേഷം സാധ്യമായതെല്ലാം ചെയ്യാമെന്നും മരടിലെ ഫ്‌ളാറ്റ് ഉടമകള്‍ക്കൊപ്പമാണ് താനെന്നും നിയമവശങ്ങള്‍ നോക്കി സര്‍ക്കാര്‍ വേണ്ടതെല്ലാം ചെയ്യുമെന്നും കോടിയേരി ഉടമകള്‍ക്ക് ഉറപ്പ് നല്‍കി. നിയമ പോരാട്ടത്തില്‍ പരാജയപ്പെട്ടാലും നിങ്ങള്‍ ഒറ്റക്കായിരിക്കില്ല ഇറങ്ങേണ്ടി വരിക എന്നും അദ്ദേഹം പറഞ്ഞു.
നേരത്തെ രമേശ് ചെന്നിത്തലയും ഫ്‌ളാറ്റുടമകളുടെ പരാതി കേട്ടിരുന്നു. പ്രശ്‌നത്തില്‍ തെറ്റുപറ്റിയെന്ന് ഉറപ്പായ സ്ഥിതിക്ക് സംസ്ഥാന സര്‍ക്കാര്‍ സുപ്രിം കോടതിയില്‍ പുതിയ അഫ്ഡിവിറ്റ് നല്‍കണമെന്ന് ആവശ്യപ്പെട്ടു. ഫ്‌ളാറ്റുടമകള്‍ക്കൊപ്പമുണ്ടെന്ന ഉറപ്പും അദ്ദേഹം നല്‍കിയാണ് മടങ്ങിയത്.