മുതലമട: അംബേദ്കര്‍ കോളനിയിലെ ദുരവസ്ഥക്ക് സി.പി.എമ്മാണ് കാരണമെന്ന് വി.കെ. ശ്രീകണ്ഠന്‍. അംബേദ്കര്‍ കോളനിയില്‍ സര്‍ക്കാറിന്റെ അവഗണനക്കെതിരേ മുതലമട മണ്ഡലം കോണ്‍ഗ്രസ് നടത്തിയ പ്രതിഷേധ മാര്‍ച്ച് ഉദ്ഘാടനം ചെയ്യുകയായിരുന്നു അദ്ദേഹം. അംബേദ്കര്‍ കോളനിയില്‍ തകര്‍ന്നവീടുകള്‍ക്ക് അറ്റകുറ്റപണികള്‍ ചെയ്തു നല്‍കാത്ത തദ്ദേശ ഭരണ സംവിധാനം കേരളത്തിന് അപമാനമെന്നും പഞ്ചായത്ത് മുതല്‍ പാര്‍ലമെന്റ് വരെ ഇടതുപക്ഷത്തിന്റെ ജനപ്രതിനിധികള്‍ ഉണ്ടായിട്ടും ദലിതര്‍ക്ക് അവഹേളനവും വികസനം തീണ്ടാത്ത അവസ്ഥയും ഉണ്ടായത് സാക്ഷരകേരളത്തിന് അപമാനമാണ്. കോളനിയില്‍ ഏതുസമയത്തും വീഴാറായ വീടുകള്‍ ഉണ്ടായിട്ടും ഇവക്കെതിരേ നടപടിയെടുക്കാത്ത തദ്ദേശഭരണ സ്ഥാപനങ്ങള്‍ എന്തെടുക്കുകയാണെന്നും ഗ്രാമസഭകളെ കോമാളിത്തരങ്ങള്‍ക്ക് ഉപയോഗപെടുത്തുന്ന പഞ്ചായത്ത് സംവിധാനമാണ് കോളനികളുടെ തകര്‍ച്ചക്ക് കാരണമാകുന്നതെന്നും അദ്ദേഹം പറഞ്ഞു.
കോളനിയിലെ 40 വീടുകളുടെ അറ്റകുറ്റപണികള്‍ കോണ്‍ഗ്രസ് നേരിട്ട് നടത്തി നല്‍കുമെന്ന് അദ്ദേഹം പറഞ്ഞു. ചെല്ലമുത്തുകൗണ്ടര്‍ അധ്യക്ഷനായി. സുമേഷ് അച്ചുതന്‍, വടവന്നൂര്‍ പഞ്ചായത്ത് പ്രസിസന്റ് സൈരന്ദ്രി, സി.സി. സുനില്‍, സജേഷ് ചന്ദ്രന്‍, എന്‍.കെ. ഷാഹൂല്‍ഹമീദ് സംസാരിച്ചു.