കൂറ്റനാട്: തിരുമിറ്റക്കോട് ഗ്രാമപഞ്ചായത്ത് പ്രസിഡന്റും തിരുമിറ്റക്കോട് സി.പി.എം ലോക്കല്‍ അംഗവും പ്രമുഖ അഭിഭാക്ഷകനുമായിരുന്ന അഡ്വ. ടി.എ പ്രസാദിന്റെ വേര്‍പാട് ഏറെ വേദനയോടെയാണ് ജനങ്ങള്‍ക്കു കേള്‍ക്കേണ്ടി വന്നത്. ജനപ്രതിനിധി എന്നനിലയില്‍ സര്‍ക്കാരിന്റെ തീരുമാനങ്ങള്‍ നടപ്പിലാക്കുന്നതിനോടൊപ്പം തന്നെ വ്യക്തമായ വികസന കാഴ്ചപ്പാടോടു കൂടി നാടിന്റെ വികസനം മുന്‍നിറുത്തി നിരവധി പദ്ധതികള്‍ തിരുമിറ്റക്കോട് ഗ്രാമപഞ്ചായത്തില്‍ നടപ്പിലാക്കാന്‍ കഴിഞ്ഞത് അദ്ദേഹത്തിന്റെ വ്യക്തിപരമായ കഴിവുകൊണ്ടാണെന്ന് പറയാത്തിരിക്കാന്‍ കഴിയില്ല.
വിദ്യാലയങ്ങളുടെ പരീക്ഷാഫലം വര്‍ധിപ്പിക്കാന്‍ പഞ്ചായത്തിന്റെയും വിദ്യാലയത്തിലെ വിദ്യാഭ്യാസ സമിതിയുടെയും നേതൃത്ത്വത്തില്‍ അദ്ദേഹം നടപ്പിലാക്കിയ പദ്ധതികള്‍ ചാത്തന്നൂര്‍ ഗവ. ഹയര്‍ സെക്കന്‍ഡറി സ്‌കൂളിലെ വിജയശതമാനം വര്‍ധിപ്പിക്കാനുള്ള സാഹചര്യമുണ്ടായിട്ടുണ്ട്. വിദ്യാര്‍ഥികളുടെ സായാഹ്ന ക്ലാസുകളില്‍ ഭക്ഷണം ഒരുക്കാനും അവിടെ സമിതികള്‍ രൂപീകരിക്കാനും സാധിച്ചത് ഏറെ എടുത്തു പറയേണ്ട പ്രവര്‍ത്തനമാണ്. പഞ്ചായത്തിലെ കുടിവെള്ള പ്രശ്‌നം പരിഹരിക്കുന്നതിനുവേണ്ടി അദ്ദേഹം നടപ്പിലാക്കിയ ഒട്ടനവധി പദ്ധതികള്‍ ഒരു പരിധിവരെ ലക്ഷ്യം കണ്ടു.
ഭാരതപ്പുഴയിലെ തടയണ നിര്‍മാണത്തിലും ജല സഭരണത്തിനായി പുതിയ പദ്ധതികള്‍ ആവിഷ്‌കരിച്ചു. ജൈവ പച്ചക്കറി വിപാലിക്കരണത്തിന് വിപുലമായ പദ്ധതികള്‍ തന്നെയായിരുന്നു അദ്ദേഹത്തിന്റെ നേതൃത്വത്തിലുള്ള ഭരണസമിതിക്ക് നടപ്പിലാക്കാന്‍ കഴിഞ്ഞത്. ഉത്സവ കാലങ്ങളില്‍ വില വര്‍ധനവ് തടഞ്ഞുനിര്‍ത്താന്‍ തദ്ദേശ സ്ഥാപനത്തിന്റെ നേതൃത്ത്വത്തില്‍ വിവിധ തലങ്ങളില്‍ ചന്തകള്‍ സംഘടിപ്പിച്ചത് മാതൃകാപരമായിരുന്നു.
നാട്ടിലുണ്ടാവുന്ന എല്ലാ തരത്തിലുള്ള ജനകീയ പ്രശ്‌നങ്ങള്‍ക്കും മുന്‍പിലും ടി.എ പ്രസാദ് ഉണ്ടായിരുന്നു. അതുകൊണ്ട് തന്നെ ജനങ്ങള്‍ക്കിടയില്‍ നല്ല അംഗീകാരം നേടാനും അദ്ദേഹത്തിന് കഴിഞ്ഞു. ഹൃദയ സംബന്ധമായ പ്രയാസങ്ങള്‍ ഒന്നും തന്നെയുള്ളതായി അദേഹം ആരോടും സൂചിപ്പിച്ചിരുന്നില്ല. അടുത്തിടെ നടന്നിട്ടുള്ള ചില പരിശോധനകളിലാണ് ഹൃദയത്തിന് ചില ബ്ലോക്കുണ്ടെന്ന് മനസിലായത്. തിരുവനന്തപുരത്തെ ശ്രീചിത്രയില്‍ ഓപ്പണ്‍ സര്‍ജറി നടത്തി ചികിത്സയിലിരിക്കെ ഇന്ന് രാവിലെ ആരോഗ്യനില വഷളാവുകയും തുടര്‍ന്ന് അന്ത്യം സംഭവിക്കുകയുമായിരുന്നു.