ലഖ്‌നൗ: മുതിര്‍ന്ന ബി.ജെ.പി നേതാവും മുന്‍ കേന്ദ്രമന്ത്രിയുമായ സ്വാമി ചിന്ദയാനന്ദിനെതിരെ ഉയര്‍ന്ന ലൈംഗികപീഡന പരാതിയുമായി ബന്ധപ്പെട്ട് അദ്ദേഹം ഉള്‍പ്പെട്ട 43 വിഡിയോകള്‍ പ്രത്യേക അന്വേഷണ സംഘത്തിന് (എസ്.ഐ.ടി) കൈമാറി. പരാതിക്കാരിയായ നിയമവിദ്യാര്‍ഥിനിയാണ് ഇത്രയും വിഡിയോകള്‍ ഒരു പെന്‍ ഡ്രൈവിലാക്കി എസ്.ഐ.ടിക്ക് ഇന്നലെ കൈമാറിയത്. ചിന്‍മയാനന്ദ് ഡയറക്ടറായ ഉത്തര്‍പ്രദേശിലെ ഷാജഹാന്‍പൂര്‍ എസ്.എസ് കോളജ് വിദ്യാര്‍ഥിനിയായ പരാതിക്കാരി രണ്ടാഴ്ച മുന്‍പാണ് അദ്ദേഹത്തിനെതിരെ ഫേസ്ബുക്കിലൂടെ പീഡന പരാതി ഉന്നയിച്ചത്. ഇതേതുടര്‍ന്ന് സംഭവം അന്വേഷിക്കാന്‍ സുപ്രിംകോടതിയാണ് എസ്.ഐ.ടി രൂപീകരിച്ച് ഉത്തരവിട്ടത്. പിന്നാലെ സ്വാമിക്കെതിരെ തെളിവുകള്‍ നല്‍കാന്‍ പെണ്‍കുട്ടിയോട് എസ്.ഐടി ആവശ്യപ്പെടുകയുണ്ടായി. ഇതോടെയാണ് 43 വിഡിയോകള്‍ സഹിതമുള്ള തെളിവുകള്‍ പെണ്‍കുട്ടിക്കു വേണ്ടി അവരുടെ പിതാവ് എസ്.ഐ.ടിക്ക് കൈമാറിയത്.

മകള്‍ക്ക് ഹോസ്റ്റലില്‍ പ്രത്യേക സൗകര്യങ്ങള്‍ അനുവദിച്ചാണ് അവളെ സ്വാമി കുടുക്കിയതെന്ന് പിതാവ് പറഞ്ഞു. ഇതുപ്രകാരം പ്രത്യക കുളിമുറിയിലായിരുന്നു അവരുടെ കുളി. ഇതിനിടെ ഒരിക്കല്‍ അവരെ സ്വാമി വിളിക്കുന്നതായി കോളജ് ജീവനക്കാര്‍ അറിയിച്ചു. സ്വാമിയുടെ അടുത്തെത്തിയപ്പോള്‍ അദ്ദേഹം കുളിമുറിയിലെ ദൃശ്യങ്ങള്‍ കാണിച്ചുതന്ന് ബ്ലാക്‌മെയില്‍ ചെയ്തു. ഇതിന്റെ പേരില്‍ പീഡിപ്പിക്കുന്നത് പതിവാക്കുകയും ചെയ്തു. ഇത്തരം വിഡിയോകള്‍ ഉപയോഗിച്ച് പീഡനം തുടര്‍ന്നതോടെ മകള്‍ ഒളികാറ ഉപയോഗിച്ച് തന്നോടപ്പമുള്ള സ്വാമിയുടെ മുഴുവന്‍ ചലനങ്ങളും റെക്കോര്‍ഡ് ചെയ്യാന്‍ തീരുമാനിച്ചു.

ഇത്തരത്തില്‍ പകര്‍ത്തിയ വിഡിയോകളാണ് എസ്.ഐ.ടിക്ക് കൈമാറിയതെന്നും അദ്ദേഹം പറഞ്ഞു.
പരാതി ഉന്നയിച്ചതിന് പിന്നാലെ സ്വാമി തെളിവുകള്‍ നശിപ്പിച്ചുവരികയാണെന്നും അതിനാല്‍ അദ്ദേഹത്തിനെതിരെ തെളിവുനശിപ്പിച്ച കുറ്റത്തിനും ശിക്ഷിക്കണമെന്നും പിതാവ് ആവശ്യപ്പെട്ടു. ഹോസ്റ്റലിലെ തെളിവുകള്‍ അയാള്‍ നശിപ്പിച്ചു. പെയിന്റുങ്ങുകള്‍ മാറ്റി. ഹോസ്റ്റലിനുള്ളിലെ പല വസ്തുക്കളും മാറ്റുകയോ അയുടെ സ്ഥാനങ്ങള്‍ മാറ്റുകയോ ചെയ്തതായും അദ്ദേഹം വ്യക്തമാക്കി.