ദോഹ: ദോഹയിലെ സ്പീഡ്‌വേ കാര്‍ഗോ ജീവനക്കാരനും കൊണ്ടോട്ടി മേലങ്ങാടി സ്വദേശിയുമായ കോണിയകത്ത് മുജീബ് റഹ്മാന്‍(43) ഖത്തറില്‍ വാഹനാപടകത്തില്‍ മരിച്ചു. ഇന്നലെ പുലര്‍ച്ചെ ബര്‍വ വില്ലേജിനടുത്ത് സെന്റര്‍ പോയിന്റിന് എതിര്‍വശത്തെ റൗണ്ട് എബൗട്ടിലുണ്ടായ അപകടത്തിലാണ് മരണം. രണ്ട് വാഹനങ്ങള്‍ തമ്മില്‍ കൂട്ടിയിടിക്കുകയും റോഡരികില്‍ നില്‍ക്കുകയായിരുന്ന മുജീബിനെ അപടകത്തില്‍പ്പെട്ട ഒരു വാഹനം ഇടിച്ച് തെറിപ്പിക്കുകയുമായിരുന്നു. ഇദ്ദേഹത്തിന്റെ കൂടെയുണ്ടായിരുന്ന സ്പീഡ് വേ കാര്‍ഗോയിലെ തന്നെ നേപ്പാളി ജീവനക്കാരന്‍ സഞ്ജയ് ഗുരുതര പരിക്കേറ്റ് ഹമദ് ആശുപത്രിയില്‍ ചികില്‍സയിലാണ്.

പുലര്‍ച്ചെ ഒന്നര മണിയോടെ അപകടത്തില്‍പ്പെട്ട മുജീബ് രാവിലെ 7 മണിയോടെ ആശുപത്രിയിലാണ് മരിച്ചത്. മുജീബ് മൂന്ന് വര്‍ഷമായി ഖത്തറില്‍ ജോലി ചെയ്തു വരികയായിരുന്നു. ഭാര്യ: ബുഷറ, മക്കള്‍: മുഹ്‌സിന്‍ മുബാറക്, നസില, മുഹമ്മദ് വസീം. പിതാവ്: കോണിയകത്ത് ആലിക്കുട്ടി. ഹമദ് മോര്‍ച്ചറിയില്‍ സൂക്ഷിച്ച മൃതദേഹം നാട്ടിലേക്ക് കൊണ്ടു പോകാനുള്ള നടപടിക്രമങ്ങള്‍ പുരോഗമിക്കുന്നതായി ബന്ധപ്പെട്ടവര്‍ അറിയിച്ചു.