ചേര്‍ത്തല: താലൂക്കാശുപത്രിയിലെ ഡോക്ടറെ യൂത്ത് കോണ്‍ഗ്രസ് പ്രവര്‍ത്തകര്‍ ഉപരോധിച്ച സംഭവത്തെ കുറിച്ച് കെ.സി വേണുഗോപാല്‍ എം.പി ആശുപത്രിയിലെത്തി അന്വേഷണം നടത്തി.
പിരിവ് നല്‍കാത്തതിനാലാണ് ഉപരോധം നടത്തിയതെന്ന ആരോപണത്തെ തുടര്‍ന്നാണ് അന്വേഷണം ഉണ്ടായത്.  
താലൂക്കാശുപത്രിയിലെ സര്‍ജന്‍ എം ഷാജി തുടര്‍ച്ചയായി അവധിയെടുത്ത് സ്വകാര്യ പ്രാക്ടീസ് നടത്തുന്നതിനാലായിരുന്നു ഉപരോധം. എന്നാല്‍, കെ.പി.സി.സി പ്രസിഡന്റ് വി.എം സുധീരന്‍ നയിക്കുന്ന കേരളയാത്രയ്ക്ക് ചോദിച്ച പിരിവ് നല്‍കാത്തതാണ് ഉപരോധത്തിന്റെ കാരണമെന്നാണ് ഡോക്ടറുടെ പരാതി. അതേസമയം, ജില്ലാതലത്തില്‍പോലും ഇതുവരെ പിരിവ് ആരംഭിച്ചിട്ടില്ലെന്ന് യൂത്ത്‌കോണ്‍ഗ്രസ് വ്യക്തമാക്കി.
ഇന്നലെ വേണുഗോപാല്‍ ആശുപത്രിയിലെത്തിയപ്പോള്‍ രണ്ടുദിവസമായി ഡോക്ടര്‍ അവധിയിലായിരുന്നു. തിങ്കളാഴ്ച്ച അവധിക്ക് അപേക്ഷ നല്‍കിയിട്ടുണ്ട്. ആശുപത്രിയില്‍ സര്‍ജന്റെ അഭാവം മൂലം ശസ്ത്രക്രിയ നടത്തേണ്ട കേസുകള്‍ പോലും മറ്റു ആശുപത്രികളിലേക്ക് റഫര്‍ ചെയ്യുകയാണ്. അതുകൊണ്ട് ഡോക്ടറുടെ അവധി അപേക്ഷ റദ്ദ് ചെയ്ത് തിങ്കളാഴ്ച്ച ജോലിയില്‍ പ്രവേശിക്കാനാവശ്യമായ നടപടി സ്വീകരിക്കണമെന്ന് ഡി.എം.ഒയോട് എം.പി ആവശ്യപ്പെട്ടു.