കോഴിക്കോട്: ആവശ്യത്തിന് ബസുകളും ട്രെയിനുകളും ഇല്ലാത്തതിനാല്‍ ഓണാവധി കഴിഞ്ഞ് ജോലിസ്ഥലങ്ങളിലേക്കും മറ്റും പോകേണ്ട മലയാളികള്‍ ദുരിതത്തില്‍.
മടക്കയാത്രക്ക് ടിക്കറ്റ് കിട്ടാതെ വലയുകയാണ് പലരും. മലബാറിലുള്ളവരാണ് ഏറെ പ്രയാസത്തിലായിരിക്കുന്നത്. സ്‌പെഷല്‍ ട്രെയിനുകളും ബസുകളും ഇല്ലാത്തതാണ് യാത്രാദുരിതം വര്‍ധിപ്പിച്ചിരിക്കുന്നത്. ട്രെയിനുകളിലും ബസുകളിലും നേരത്തേതന്നെ റിസര്‍വേഷന്‍ പൂര്‍ത്തിയായിരുന്നു. മലബാറില്‍ നിന്ന് ബംഗളൂരുവിലേക്ക് ഇത്തവണ പ്രത്യേക ട്രെയിന്‍ ഉണ്ടായിരുന്നില്ല. കണ്ണൂരില്‍ നിന്ന് ബംഗളൂരുവിലേക്കുള്ള പ്രതിദിന ട്രെയിനായ യശ്വന്ത്പൂര്‍ കണ്ണൂര്‍ എക്‌സ്പ്രസ് മാത്രമാണ് ഏക ആശ്രയം. ഇതില്‍ ദിവസങ്ങള്‍ക്ക് മുന്‍പുതന്നെ റിസര്‍വേഷന്‍ പൂര്‍ത്തിയായി.
ആവശ്യത്തിന് ട്രെയിന്‍ ഇല്ലാത്തതിനാല്‍ സ്വകാര്യ ബസുകള്‍ ഭീമമായ തുകയാണ് യാത്രക്കാരില്‍ നിന്ന് ഈടാക്കുന്നത്. ഉയര്‍ന്ന തുക നല്‍കിയാല്‍ പോലും ടിക്കറ്റ് കിട്ടാത്ത അവസ്ഥയാണെന്ന് യാത്രക്കാര്‍ പറയുന്നു.