ദമാം: കിഴക്കന്‍ മേഖലയിലെ ഖതീഫില്‍ തീവ്രവാദികള്‍ കാറില്‍ സ്‌ഫോടക വസ്തുക്കള്‍ കടത്തുന്നതിനിടെ ഉണ്ടായ സ്‌ഫോടനത്തില്‍ കൊല്ലപ്പെട്ട തീവ്രവാദികളെ തിരിച്ചറിഞ്ഞതായി സഊദി ആഭ്യന്തര മന്ത്രാലയം വ്യക്തമാക്കി.

പൂര്‍ണമായും കത്തിക്കരിഞ്ഞ മൃതദേഹം ഡി എന്‍ എ പരീക്ഷണത്തിലൂടെയാണ് തിരിച്ചറിഞ്ഞത്. നിരവധി കേസുകളിലെ പ്രതികളും സഊദി ആഭ്യന്തര മന്ത്രാലയം അന്വേഷിച്ചു കൊണ്ടിരുന്ന ഫാദില്‍ അല്‍ ഹമാദി, മുഹമ്മദ് അല്‍ സുവെയിമില്‍ എന്നിവരാണ് കൊല്ലപ്പെട്ടതെന്ന് സഊദി ആഭ്യന്തര മന്ത്രാലയ വക്താവ് കേണല്‍ മന്‍സൂര്‍ അല്‍ തുര്‍ക്കി വാര്‍ത്താ സമ്മേളനത്തില്‍ വ്യക്തമാക്കി.

സുരക്ഷാ കേന്ദ്രങ്ങളെയും ഓഫിസര്‍മാരെയും ലക്ഷ്യംവച്ച് നടത്തിയ സ്‌ഫോടനത്തില്‍ പ്രതികളാണിവരും. സ്‌ഫോടനങ്ങളില്‍ സുരക്ഷാ സേനകള്‍ കൊല്ലപ്പെടുകയും ചെയ്തിട്ടുണ്ട്.

ഇ മാസം ആദ്യമാണ് കാറില്‍ വന്‍ തോതിലുള്ള സ്‌ഫോടക വസ്തുക്കള്‍ നിറച്ച് കടത്തുന്നതിനിടെ ഖതീഫ് അങ്ങാടിയില്‍വച്ച് പൊട്ടി തെറിച്ചത്. സുരക്ഷാ സേന ഇവരെ പിന്തുടരുന്നതിനിടെ രക്ഷപ്പെടാനുള്ള ശ്രമത്തിനിടെ കാര്‍ പൊട്ടിത്തെറിക്കുകയായിരുന്നു.