തിരുവനന്തപുരം: ജലസമൃദ്ധിയുടെ പ്രവര്‍ത്തനങ്ങള്‍ക്ക് കൂടുതല്‍ ഉണര്‍വേകാന്‍ വാര്‍ഡുതലത്തില്‍ അഞ്ചുപേരെ ജലമിത്രങ്ങളായി തിരഞ്ഞെടുക്കുമെന്ന് ഐ.ബി സതീഷ് എം.എല്‍.എ. സന്നദ്ധപ്രവര്‍ത്തനങ്ങളില്‍ താല്‍പര്യമുള്ള, നേതൃപാടവമുള്ള, ജലത്തിനോടും പ്രകൃതിയോടും പ്രതിബദ്ധതയുള്ളവരായിരിക്കും ജലമിത്രങ്ങള്‍. ജലസമൃദ്ധി പദ്ധതിയുമായി ബന്ധപ്പെട്ട് വാര്‍ഡില്‍ നടക്കുന്ന പ്രവൃത്തികളില്‍ ബഹുജനപങ്കാളിത്തം ഉറപ്പാക്കുകയാണ് ലക്ഷ്യമെന്നും കലക്ടറേറ്റ് കോണ്‍ഫറന്‍സ് ഹാളില്‍ ചേര്‍ന്ന കാട്ടാക്കട മണ്ഡലത്തിലെ ജലസമൃദ്ധി പദ്ധതി അവലോകനയോഗത്തില്‍ എം.എല്‍.എ പറഞ്ഞു.
പഞ്ചായത്ത് പ്രസിഡന്റ്, സെക്രട്ടറി, ബന്ധപ്പെട്ട ഉദ്യോഗസ്ഥര്‍ എന്നിവരടങ്ങുന്ന കമ്മിറ്റിയാവും ജലമിത്രങ്ങളെ കണ്ടെത്തുക.  ഇതുകൂടാതെ മണ്ഡലത്തിലെ 122 വാര്‍ഡുകളിലും 50 പേരടങ്ങുന്ന ഒരു ഗ്രൂപ്പ് രൂപീകരിച്ച് സന്നദ്ധപ്രവൃത്തനങ്ങളുടെ ആക്കം കൂട്ടുമെന്നും അദ്ദേഹം പറഞ്ഞു.
തോടുകളുടെ പുനരുജ്ജീവനം ലക്ഷ്യമിട്ട്  വിവിധ വകുപ്പുകളുടെ പ്രതിനിധികളും, ജനപ്രതിനിധികളും, സന്നദ്ധപ്രവര്‍ത്തകരും മച്ചേല്‍ തോട്ടിലൂടെ കലക്ടറോടൊപ്പം ജലയാത്ര നടത്തുന്നതിനും യോഗത്തില്‍ തീരുമാനിച്ചു.  യോഗത്തില്‍ വിവിധ വകുപ്പുകളുടെ ഉദ്യോഗസ്ഥരും പഞ്ചായത്തുകളിലെ ജനപ്രതിനിധികളും സംബന്ധിച്ചു.