വെട്ടത്തൂര്‍: തൂത വെട്ടത്തൂര്‍ റോഡില്‍ വെട്ടത്തൂര്‍ ഏഴുതല ഇഫാ ജങ്ഷനിലെ വെള്ളക്കെട്ട് ഒഴിവാക്കാന്‍ നടപടി തുടങ്ങി. ഇവിടെ പാലക്കുന്ന് അങ്കണവാടിക്ക് സമീപം വെള്ളം ഒഴിഞ്ഞുപോകാന്‍ അഴുക്കുചാലോ മറ്റു സംവിധാനങ്ങളോ ഇല്ലാത്തതിനാല്‍ മഴക്കാലത്ത് വെള്ളംകെട്ടിക്കിടക്കുന്നതും യാത്രക്കാര്‍ ദുരിതത്തിലാകുന്നതും സംബന്ധിച്ച് 'സുപ്രഭാതം' വാര്‍ത്ത നല്‍കിയിരുന്നു.
മരാമത്ത് വകുപ്പ് അനുവദിച്ച 15ലക്ഷം രൂപ ചെലവഴിച്ചാണ് പ്രവൃത്തികള്‍ നടന്നുവരുന്നത്. വെള്ളക്കെട്ട് രൂക്ഷമായ സ്ഥലത്ത് മണ്ണുമാന്തിയന്ത്രം ഉപയോഗിച്ച് മണ്ണുനീക്കി വെള്ളംകെട്ടാതെ ഒഴുകിപ്പോകാനുള്ള സൗകര്യമാണ് ചെയ്തുവരുന്നത്. ഇതോടൊപ്പം ഏഴുതലയില്‍ റോഡരിക് ഇടിഞ്ഞുതാഴ്ന്ന ഭാഗത്ത് അപകടങ്ങളൊഴിവാക്കാനുള്ള സംരക്ഷണ ഭിത്തിയുമൊരുക്കും.
നിലവില്‍, അപകട ഭീഷണിയൊഴിവാക്കാന്‍ നാട്ടുകാര്‍ ചേര്‍ന്ന് താല്‍ക്കാലിക സംവിധാനം ഏര്‍പ്പെടുത്തിയിരിക്കുകയാണ് ഇവിടെ. റോഡില്‍ പാരപ്പറ്റ്, സംരക്ഷണഭിത്തി എന്നിവ പണിയുമെന്ന് മരാമത്ത് വകുപ്പ് മേലാറ്റൂര്‍ എ.ഇ പി.ഹംസ പറഞ്ഞു. ചെര്‍പ്പുളശേരി, തൂത എന്നിവിടങ്ങളില്‍ നിന്നും ഊട്ടി, മൈസൂരു തുടങ്ങിയ സ്ഥലങ്ങളിലേക്ക് എളുപ്പവഴിയായതിനാല്‍ സ്വകാര്യ വാഹങ്ങള്‍ ഉള്‍പ്പെടെ കടന്നുപോകുന്ന പാതയാണിത്.