സുല്‍ത്താന്‍ ബത്തേരി: മഴക്കാലത്തും കുടിവെള്ളം കിട്ടാക്കനിയായി നെന്മേനി പഞ്ചായത്തിലെ 17 ാം വാര്‍ഡായ മലങ്കരവയല്‍ കുറുമ കോളനി വാസികള്‍. കോളനിയില്‍ വിവിധ പദ്ധതികളില്‍ നിര്‍മിച്ച രണ്ടു കിണറുകളും ഒരു കുളവുമുണ്ടെങ്കിലും ഇവയിലൊന്നും ഒരു തുള്ളി വെള്ളമില്ലാത്ത അവസ്ഥയാണ്. പതിറ്റാണ്ടുകള്‍ക്ക് മുന്‍പ് നിര്‍മിച്ച ഈ കിണറുകള്‍ ഇത്തവണത്തെ ശക്തമായി വേനലില്‍ വറ്റുകയായിരുന്നു. ഇതോടെ ഇവരുടെ ആശ്രയം ഒരു കിലോമീറ്ററോളം ദൂരെയുള്ള കേണിയാണ്്. എന്നാല്‍ കേണിയിലും വെള്ളം താഴ്ന്നതോടെ ചിരട്ട ഉപയോഗിച്ചാണ് വെള്ളം കേണിയില്‍ നിന്നും കോരിയെടുക്കുന്നത്. പഞ്ചായത്ത് അധികൃതരെ കോളനിയിലെ കുടിവെള്ള ക്ഷാമം ശ്രദ്ധയില്‍പ്പെടുത്തിയെങ്കിലും പരിഹാരം കാണാന്‍ ഇതുവരെ യാതൊരു നടപടിയുമുണ്ടായിട്ടില്ല.