വള്ളുവമ്പ്രം: പൂക്കോട്ടൂര്‍ പഞ്ചായത്തിലെ വള്ളുവമ്പ്രം ആലുങ്ങപ്പൊറ്റ സ്വദേശി 55 വയസുകാരന്‍ കുഞ്ഞാറ്റപ്പറമ്പില്‍ ശശിധരനെ കാണാതായി ഒരുമാസം പിന്നിട്ടിട്ടും കണ്ടെത്താനായില്ല. സെപ്റ്റംബര്‍ 30ന് ഞായറാഴ്ച വൈകിട്ട് മുതലാണ് കാണാതാകുന്നത്. ബന്ധുക്കള്‍ പൊലിസില്‍ പരാതി നല്‍കിയെങ്കിലും ഇതുവരെ നടപടിയൊന്നുമായില്ല. അഞ്ചടി ഉയരവും ഇരുനിറത്തിലുള്ള ഇദ്ദേഹത്തിന് സംസാര ശേഷിയോ കേള്‍വിശേഷിയോ ഇല്ല.
പതിവായി റോഡിലിറങ്ങി നടക്കാറുള്ള ശശിധരന്‍ വൈകിട്ടോടെ വീട്ടില്‍ തിരിച്ചെത്താറുണ്ട്. കാണാതായപ്പോള്‍ വെള്ള കള്ളി ഷര്‍ട്ടും ലുങ്കിത്തുണിയുമാണ് ധരിച്ചിരുന്നത്.
ആദ്യത്തെ രണ്ട് ദിവസം ബന്ധുക്കളും നാട്ടുകാരും നടത്തിയ അന്വേഷണത്തില്‍ മഞ്ചേരി നറുകര ഭാഗത്ത് കണ്ടതായി അറിയാന്‍ സാധിച്ചതിന് പിന്നാലെ തെരച്ചില്‍ നടത്തിയെങ്കിലും എവിടെയും കണ്ടെത്താനായില്ല. ദിവസങ്ങളായ സന്നദ്ധ സംഘങ്ങള്‍, മറ്റു സോഷ്യല്‍ മീഡിയകള്‍ വഴി ശശിധരന്റെ ഫോട്ടോ സഹിതമുള്ള പോസ്റ്റര്‍ പ്രചാരിപ്പിച്ചെങ്കിലും ഇതുവരെയ്ക്കും കണ്ടെത്താനായിട്ടില്ല. പലയിടത്തും പോസ്റ്ററുകള്‍ ഒട്ടിച്ചും അന്വേക്ഷണം പുരോഗമിക്കുന്നുണ്ട്. രാത്രി എഴ് കഴിഞ്ഞാല്‍ പുറത്തിറങ്ങാന്‍ ഭയമുള്ള ശശിധരനെ ഇതുവരെയും കണ്ടെത്താന്‍ കഴിയാത്തതിന്റെ അങ്കലാപ്പിലാണ് ബന്ധുക്കളും നാട്ടുകാരും. ഇയാള്‍ അവിവാഹിതനാണ്.