തിരുവനന്തപുരം: ഓണ്‍ലൈന്‍ വഴി ട്രെയിന്‍ ടിക്കറ്റ് ബുക്ക് ചെയ്യുന്നവരില്‍നിന്ന് ഐ.ആര്‍.സി.ടി.സി സര്‍വിസ് ചാര്‍ജ് ഈടാക്കിത്തുടങ്ങിയതോടെ യാത്രാ ഇളവിന് അര്‍ഹതയുള്ള യാത്രക്കാര്‍ പ്രയാസത്തിലായി. ഓണ്‍ലൈനില്‍ ടിക്കറ്റ് എടുക്കാന്‍ കഴിയുന്ന അംഗപരിമിതര്‍ക്കും 60 വയസ് മുതലുള്ള മുതിര്‍ന്ന പൗരന്മാര്‍ക്കുമാണ് സര്‍വിസ് ചാര്‍ജ് തിരിച്ചടിയായിരിക്കുന്നത്.
ഈ മാസം ഒന്നു മുതല്‍ നോണ്‍ എ.സി ക്ലാസുകളിലെ ടിക്കറ്റിന് 15 രൂപയും എ.സി ക്ലാസുകള്‍ക്ക് 30 രൂപയും (ഫസ്റ്റ് ക്ലാസ് ഉള്‍പ്പെടെ) സര്‍വിസ് ചാര്‍ജായും ഒപ്പം ജി.എസ്.ടിയുമാണ് ഐ.ആര്‍.സി.ടി.സി (ഇന്ത്യന്‍ റെയില്‍വേ കാറ്ററിങ് ആന്‍ഡ് ടൂറിസം കോര്‍പ്പറേഷന്‍) ചുമത്തുന്നത്. തിരുവനന്തപുരത്തുനിന്ന് എറണാകുളത്തേക്ക് സെക്കന്‍ഡ് ക്ലാസില്‍ യാത്ര ചെയ്യുന്ന ഒരാള്‍ക്ക് 95 രൂപ നല്‍കിയിരുന്ന സ്ഥാനത്ത് സര്‍വിസ് ചാര്‍ജും ജി.എസ്.ടിയും ചേര്‍ത്ത് 113 രൂപ നല്‍കേണ്ടി വരും. ഫലത്തില്‍ നോണ്‍ എ.സി ക്ലാസിലെ ടിക്കറ്റിന് ആകെ 18 രൂപയുടെ വര്‍ധനവാണ് ഉണ്ടാകുന്നത്. എ.സി ക്ലാസിന് 35 രൂപയോളവും വര്‍ധനവുണ്ടാകും.
അംഗപരിമിതരില്‍ ചലനശേഷിക്ക് പ്രശ്‌നമുള്ളവര്‍ക്കും മാനസിക, കാഴ്ച പ്രശ്‌നങ്ങളുള്ളവര്‍ക്കും സെക്കന്‍ഡ്, സ്ലീപ്പര്‍, ഫസ്റ്റ് ക്ലാസുകളിലും ത്രീടയര്‍ എ.സിയിലും 75 ശതമാനം ഇളവാണ് റെയില്‍വേ നല്‍കുന്നത്. 60 വയസു മുതല്‍ പുരുഷന്മാര്‍ക്ക് എല്ലാ ക്ലാസിലും 40 ശതമാനവും സ്ത്രീകള്‍ക്ക് 50 ശതമാനവും ഇളവ് ലഭിക്കുന്നുണ്ട്. ഇവര്‍ക്കൊക്കെയും സര്‍വിസ് ചാര്‍ജ് അധിക ബാധ്യതയായിരിക്കുകയാണ്. ഓണ്‍ലൈന്‍ ഇടപാടുകള്‍ക്ക് സര്‍വിസ് ചാര്‍ജ് ഈടാക്കേണ്ടതില്ലെന്ന് മൂന്നു വര്‍ഷം മുന്‍പ് എടുത്ത തീരുമാനമാണ് ഐ.ആര്‍.സി.ടി.സി ഈ മാസം ഒന്നു മുതല്‍ റദ്ദാക്കിയിരിക്കുന്നത്. വരുമാനക്കുറവാണ് പുതിയ തീരുമാനത്തിന് പിന്നിലെന്നാണ് റെയില്‍വേയുടെ ന്യായീകരണം.