-ഗോള്‍മഴ പെയ്യിച്ച് ചെല്‍സി

ലണ്ടന്‍: ഇംഗ്ലീഷ് പ്രീമിയര്‍ ലീഗില്‍ നിലവിലെ ചാംപ്യന്‍മാരായ മാഞ്ചസ്റ്റര്‍ സിറ്റി ഇത്തരമൊരു പരാജയം പ്രതീക്ഷിച്ചിട്ടുണ്ടാവില്ല. താരതമ്യേന ദുര്‍ബലരായ നോര്‍വിച്ച് സിറ്റിയോടെ 3-2ന്റെ ഞെട്ടിക്കുന്ന പരാജയം.
മത്സരത്തിന്റെ തുടക്കം മുതല്‍ ആക്രമിച്ചു കളിച്ചിട്ടും സിറ്റിക്ക് ജയിക്കാന്‍ കഴിഞ്ഞില്ല. ആദ്യ പകുതിയില്‍ രണ്ട് ഗോളിന് മുന്നിട്ടുനിന്ന ആതിഥേയര്‍ക്കെതിരേ മാഞ്ചസ്റ്റര്‍ സിറ്റി ഒരു ഗോള്‍ തിരിച്ചടിച്ചെങ്കിലും മൂന്നാം ഗോളും വീണതോടെ കടുത്ത സമ്മര്‍ദത്തിലേക്ക് വീഴുകയായിരുന്നു.
നോര്‍വിച്ചിനുവേണ്ടി കെന്നി മക്ലീന്‍(18), ടോഡ് കോണ്ട്‌വെല്‍(28), ടീമു പുക്കി(50) എന്നിവര്‍ ഗോള്‍ നേടി. സെര്‍ജിയോ അഗ്യൂറോ(45), റോഡ്രിഗോ(88) എന്നിവരാണ് സിറ്റിയുടെ ഗോള്‍സ്‌കോറര്‍മാര്‍. പരാജയത്തോടെ സിറ്റിക്ക് ഒന്നാമതുള്ള ലിവര്‍പൂളുമായി ഗോള്‍വ്യത്യാസം കുറക്കാന്‍ കഴിഞ്ഞില്ല. ഇരുടീമിന്റെയും അഞ്ച് മത്സരങ്ങള്‍ അവസാനിച്ചപ്പോള്‍ ലിവര്‍പൂളിന് 15ഉം സിറ്റിക്ക് 10ഉം പോയിന്റുണ്ട്.
മറ്റൊരു മത്സരത്തില്‍ ടാമി എബ്രഹാമിന്റെ ഹാട്രിക് മികവില്‍ ചെല്‍സി അട്ടിമറി വിരുതരായ വോള്‍വ്‌സിനെ അവരുടെ തട്ടകത്ത് 5-2ന് പരാജയപ്പെടുത്തി. 34, 41, 55 മിനുട്ടുകളിലാണ് ടാമിയുടെ എതിര്‍വല നിറക്കല്‍.
വോള്‍വ്‌സിനായി ഒരു സെല്‍ഫ് ഗോളടിച്ച് ടാമിയുടെ ഗോള്‍ നേട്ടം 'നാലാക്കാനും' ടാമി എബ്രഹാമിനായി. ഫിക്കായോ ടൊമോരിയാണ് ചെല്‍സിയുടെ ഗോള്‍നേട്ടത്തിന് തുടക്കമിട്ടത്. മാസന്‍ മൗണ്ടാണ് ചെല്‍സിയുടെ അഞ്ചാം ഗോള്‍ സ്വന്തമാക്കിയത്. ജയത്തോടെ ചെല്‍സി ആറാം സ്ഥാനത്തേക്കുയര്‍ന്നു.