ഗോളടിനേട്ടം കൂവിവിളിച്ച
ആരാധകര്‍ക്ക് മുന്നില്‍

പാരിസ്: ഹൊ... മാസ് എന്‍ട്രി എന്നാല്‍ ഇതാണ്. ബാഴ്‌സലോണയിലേക്ക് ചേക്കേറാന്‍ താല്‍പര്യം കാണിച്ചതിനെ തുടര്‍ന്ന് കൂവിവിളിച്ച സ്വന്തം ആരാധകര്‍ക്ക് മുന്നില്‍ നെയ്മര്‍ അടിച്ചത് ഒന്നാന്തരമൊരു ബൈസിക്കിള്‍ ഗോള്‍. ഇത് കണ്ടാല്‍ ഏതൊരാളും ചെയ്യുന്ന കാര്യം കൂവിവിളിച്ച ആരാധകരും ചെയ്തു. താരത്തിന്റെ ഗോളടിനേട്ടത്തില്‍ എഴുന്നേറ്റ് നിന്ന് കൈയടിച്ചു. കരാര്‍ വിവാദവും പരുക്കും നീണ്ട നെയ്മറിന്റെ കരിയറിലെ നാല് മാസത്തെ ഇടവേളയ്ക്ക് ശേഷമെത്തിയ മത്സരത്തിലാണ് താരത്തിന്റെ കിടിലന്‍ ഗോള്‍. അതോടെ തിരിച്ചുവരവ് ഗംഭീരമാക്കാനും താരത്തിന് സാധിച്ചു.
ഫ്രഞ്ച് ലീഗില്‍ സ്റ്റ്രാസ്ബര്‍ഗിനെതിരായ മത്സരത്തിലാണ് നെയ്മറിന്റെ ബൈസിക്കിള്‍ ഗോള്‍ മാജിക്. മത്സരത്തില്‍ നെയ്മറിന്റെ ഗോള്‍ മികവില്‍ പി.എസ്.ജി 1-0ന് ജയിക്കുകയും ചെയ്തു. മോശം ഫോമിനെ തുടര്‍ന്ന് ഏറെ പഴി കേട്ട നെയ്മര്‍ ഈ സീസണില്‍ നാല് മത്സരങ്ങളുടെ ഇടവേളക്ക് ശേഷമാണ് കളത്തിലിറങ്ങിയത്. എന്നാല്‍, ബ്രസീലിന്റെ സൂപ്പര്‍ താരത്തോട് പി.എസ്.ജി ആരാധകര്‍ ഒട്ടും ദയ കാണിച്ചില്ല. ഗാലറിയില്‍ ഇരുന്ന് ഉറക്കെ കൂവി. ബാഴ്‌സലോണയിലേക്ക് നെയ്മര്‍ പോകുമെന്ന അഭ്യൂഹത്തെ തുടര്‍ന്ന് ബ്രസീല്‍ താരത്തിനെതിരായ പോസ്റ്ററുകളും ഗാലറിയില്‍ ഉയര്‍ന്നിരുന്നു. നെയ്മറിനെ കൊണ്ടുപോയി റെഡ്‌സ്ട്രീറ്റില്‍ വില്‍ക്കൂ എന്നിങ്ങനെ പോകുന്നു ബാനറിലെ സന്ദേശങ്ങള്‍.പക്ഷേ നെയ്മറിനെ ഇതൊന്നും ബാധിച്ചില്ല.
ഗോളിലൂടെയായിരുന്നു ഇതിനെല്ലാം ബ്രസീല്‍ താരത്തിന്റെ മറുപടി. ഒരു ഗോള്‍ നേടാന്‍ വിഷമിച്ച പി.എസ്.ജിക്കായി ഇഞ്ചുറി ടൈമില്‍ ഇടതു വിങ്ങില്‍ നിന്ന് ഡിയാലോ നല്‍കിയ മികച്ചൊരു ക്രോസ് നെയ്മറിന്റെ പിറകിലേക്കാണ് വന്നത്. തദവസരത്തില്‍ ഒരു സ്റ്റെപ്പ് പിറകിലേക്ക് പോയ നെയ്മര്‍ ഒന്നാന്തരമൊരു ബൈസിക്കിള്‍ കിക്കിലൂടെ എതിര്‍ പോസ്റ്റിന്റെ ഇടത്തെ മൂലയിലെത്തിച്ചു. ഇതോടെ അതുവരെ കൂവിയ ആരാധകര്‍ നെയ്മറിനു വേണ്ടി കൈയടിച്ചു. ജയത്തോടെ പി.എസ്.ജി അഞ്ച് കളികളില്‍ നിന്ന് നാലു ജയം സഹിതം 12 പോയിന്റുമായി ലീഗില്‍ ഒന്നാമതെത്തി.