പേരാവൂര്‍: ആറളം വന്യജീവി സങ്കേതം എ.കെ.എസിന്റെ നേതൃത്വത്തില്‍ അടപ്പിച്ചു.
ആറളം ഫാമില്‍ കാട്ടാനയുടെ അക്രമം പതിവായ സാഹചര്യത്തിലാണ് പ്രകടനമായി എത്തിയ പ്രവര്‍ത്തകര്‍ വന്യജീവി സങ്കേതത്തിലേക്ക് കയറി അസിസ്റ്റന്റ് വൈല്‍ഡ് ലൈഫ് വാര്‍ഡന്റെ കാര്യാലയം ഉള്‍പ്പെടെ അടച്ചുപൂട്ടിയത്. കാട്ടാന കഴിഞ്ഞ ദിവസം പുലര്‍ച്ചെ 13-ാം ബ്ലോക്കിലെ ദേവുവിനെ കുടില്‍ പൊളിച്ച് ചവിട്ടികൊന്നിരുന്നു. ഇതില്‍ പ്രതിഷേധിച്ചാണ് പ്രകടനമായി വളയംചാലിലുള്ള ആറളം വന്യജീവി സങ്കേതത്തില്‍ എത്തിയത്. അടഞ്ഞുകിടന്ന ഗെയിറ്റ് ചാടികയറിയ പ്രവര്‍ത്തകര്‍ അസിസ്റ്റന്റ് വൈല്‍ഡ് ലൈഫ് വാര്‍ഡന്റെ ഓഫിസിലെത്തി. സി.പി.എം ജില്ലാ കമ്മറ്റി അംഗം കെ. ശ്രീധരന്‍ ഉദ്ഘാടനം ചെയ്തു. ബിനോയി കുര്യന്‍, സുരേഷ് ബാബു, ലക്ഷ്മി ബാലന്‍, എന്‍.സി കുഞ്ഞിരാമന്‍, ടി.കെ രാമചന്ദ്രന്‍ സംസാരിച്ചു.