മലപ്പുറം: കളിക്കളം താണ്ടിയ യാത്രയ്‌ക്കൊടുവില്‍ ഇന്ത്യന്‍ സൂപ്പര്‍ ലീഗ് ഫുട്‌ബോളിലെ മികച്ച മലയാളി ഡിഫന്‍ഡര്‍ അനസിന് ഇനി ഓസ്‌ട്രേലിയയില്‍ പരിശീലനം. മലയാളിയായ അനസ് എടത്തൊടികയുള്‍പ്പെടെ നാലു പേരെയാണു ഡൈനാമോസ് എഫ്.സി രണ്ടാഴ്ചത്തെ പരിശീലനത്തിന് ഓസ്‌ട്രേലിയയിലേക്കയക്കുന്നത്. തിങ്കളാഴ്ച ഡല്‍ഹിയില്‍ നിന്നും പുറപ്പെടുന്ന ഇവര്‍ രണ്ടാഴ്ച ഓസ്‌ട്രേലിയന്‍ മൈതാനിയില്‍ പന്തുരുട്ടും. അതിനു ശേഷം ഇംഗ്ലണ്ടിലാണു ഡല്‍ഹി ടീമിന്റെ പരിശീലന കളരി. ഒക്ടോബറില്‍ നടക്കുന്ന ഐ.എസ്.എല്‍ മൂന്നാം സീസണിലുള്ള   തയ്യാറെടുപ്പിലാണിപ്പോള്‍ ഈ യുവതാരം.
കൊണ്ടോട്ടി മുണ്ടപ്പലത്തെ  മുഹമ്മദ് കുട്ടിയുടെയും ഖദീജയുടേയും മകനാണ് അനസ്. പിതാവിന്റെ വഴിയേ  ഡ്രൈവറാകാന്‍ മോഹം താലോലിച്ചു  നടന്ന അനസിനു വളയം തിരിച്ചു പിടിപ്പിച്ചതു കൊണ്ടോട്ടി  ഇ.എം.ഇ.എ ഹൈസ്‌കൂളിലെ ജോഗ്രഫി അധ്യാപകനായ സി.ടി.അജ്മലാണ്.  അജ്മലിന്റെ നേതൃത്വത്തില്‍ സ്‌കൂളില്‍ രൂപീകരിച്ച ഫുട്‌ബോള്‍ കോച്ചിങ് ക്യാംപിലൂടേയും സ്‌കൂള്‍ ടീമീലൂടേയുമാണ് അനസിന്റെ കളിമിടുക്കു പുറത്തുവന്നത്. അന്നു കൂടെ പരിശീലിച്ച  മറ്റൊരു കൂട്ടുകാരന്‍ സീര്‍ മുഹമ്മദ ഇപ്പോള്‍ ഇന്ത്യന്‍ റെയില്‍വെ ടീമില്‍ ഗോള്‍ കീപ്പറാണ്.  പ്ലസ്ടു വരെ ഇതേ അധ്യാപകന്റെ ശിക്ഷണത്തിലായിരുന്നു പരിശീലനം. ഇതിനിടയില്‍ രണ്ടു തവണ മലപ്പുറം ജില്ലാ സ്‌കൂള്‍ ടീമിലും ജില്ലാ ലീഗ് മത്സരങ്ങളിലും പിന്നീട് മഞ്ചേരി എന്‍ എസ് എസ് കോളജിലെ പഠന കാലത്തു കേരളാ യൂത്ത് ടീമിലും എത്തി.  കൊണ്ടോട്ടി ഇ എം ഇ കോളജില്‍ പഠിക്കുമ്പോഴാണ് മുംബൈ എഫ്.സിയിലെത്തുന്നത്.  ഇവിടെ മൂന്നു വര്‍ഷവും പൂനെ എഫ്. സി ക്കു വേണ്ടി രണ്ടു വര്‍ഷവും മഹാരാഷ്ട്രാ, കേരളാ സംസ്ഥാനങ്ങള്‍ക്കായി ഒരോ തവണ വീതം സന്തോഷ് ട്രോഫിയും കളിച്ചു. കഴിഞ്ഞ സീസണിലാണ് ഐ.എസ്.എലില്‍ ഡല്‍ഹി ഡൈനാമോസിനായി  പ്രകടനം നടത്തിയത്. സാഫ് ഗെയിംസിനായുളള ഇന്ത്യന്‍ ടീമില്‍ ഇടം പിടിച്ചത്. ആദ്യ ഇലവനില്‍ കളിക്കാന്‍ കോച്ച് ഉറപ്പിച്ചിരുന്നെങ്കിലും പരുക്കു കാരണം കളിക്കാനായില്ല.
അന്താരാഷ്ട്ര പ്രകടനങ്ങളിലെല്ലാം വലിയ പ്രചോദനം പഴയ സ്‌കൂള്‍ അധ്യാപകന്റെതു തന്നെയെന്നു അനസ് പറയുന്നു. അരിമ്പ്ര  സ്വദേശിയായ അജ്മല്‍ ഇപ്പോള്‍ അണ്ണാമല യൂനിവേഴ്‌സി്റ്റിയില്‍ ഗവേഷണ വിദ്യാര്‍ഥിയാണ്. പഠന തിരക്കുകള്‍ക്കിടയിലും ശിഷ്യന്റെ കളിപ്രകടനം കാണാന്‍ സമയം കണ്ടെത്തുന്നു. കളി ഓസ്‌ട്രേലിയയിലോ , ഇംഗ്ലണ്ടിലോ ആയാലും ബൂട്ടണിയുമ്പോഴെല്ലാം അനസിന്റെ ഫോണ്‍ വിളിയും വാട്‌സ്ആപ്പ് വഴി കളിക്കള വിശേഷങ്ങളുമെത്തും.നിര്‍ദേശങ്ങളുമായി ഫോണിലു മറുതലക്കല്‍ പഴയ ജോഗ്രഫി മാഷുണ്ട്.