ഇംഫാല്‍: ഐ ലീഗ് ഫുട്‌ബോളില്‍ ഗോകുലം കേരള എഫ്.സിക്കു തുടര്‍ച്ചയായ രണ്ടണ്ടാം സമനില. നെരോക്ക എഫ്.സിയെ അവരുടെ ഹോം ഗ്രൗണ്ടില്‍ നടന്ന മത്സരത്തിലാണ് ഗോകുലം 1-1 ന് സമനിലയില്‍ തളച്ചത്.
45-ാം മിനുട്ടില്‍ ബോഡോയുടെ ഗോളിലൂടെ ഗോകുലം മുന്നിലെത്തുകയായിരുന്നു. രണ്ടാം പകുതിക്ക് ശേഷം പൊരുതിക്കളിച്ച നെരോക്ക 59-ാം മിനുട്ടില്‍ പ്രതിരോധ താരം എഡൈ്വഡോ ഫെറാറിയിലൂടെ ഗോള്‍ മടക്കി സമനില പിടിച്ചു.
ആദ്യ പകുതിയില്‍ ഗോകുലം മികച്ച പ്രകടനം കാഴ്ചവച്ചെങ്കിലും രണ്ടാം പകുതിയില്‍ നെരോക്കയുടെ മുന്നേറ്റത്തിന് മുന്നില്‍ ഗോകുലത്തിന് പിടിച്ചുനില്‍ക്കാന്‍ കഴിയാതായി. പല അവസരങ്ങളും കളഞ്ഞുകുളിച്ച അന്റോണിയോ ജര്‍മനെ പിന്‍വലിച്ച് മലയാളി താരം സുഹൈറിനെ ഇറക്കിയതോടെ കളി അല്‍പം മാറി. സുഹൈര്‍ എത്തിയതോടെ നെരോക്ക ഗോള്‍മുഖത്തേക്ക് പന്തെത്തിത്തുടങ്ങി. സമനിലയോടെ രണ്ട് പോയിന്റുമായി പട്ടികയില്‍ അഞ്ചാം സ്ഥാനത്താണ് ഗോകുലമുള്ളത്.
കോഴിക്കോട് കോര്‍പറേഷന്‍ സ്റ്റേഡിയത്തില്‍ നടന്ന സീസണിലെ ആദ്യ മത്സരത്തില്‍ വമ്പന്‍മാരായ മോഹന്‍ ബഗാനുമായും ഗോകുലം സമനില പിടിച്ചിരുന്നു. ആദ്യ മത്സരത്തില്‍ മികച്ച പ്രകടനം പുറത്തെടുത്ത രാജേഷ് രണ്ടാം മത്സരത്തില്‍ കാര്യമായ നീക്കങ്ങളൊന്നും നടത്തിയില്ല. മിഡ്ഫീല്‍ഡിലുണ്ടായിരുന്ന മൂസയാണ് മുന്നേറ്റനിരക്ക് കൃത്യമായി പന്തെത്തിച്ചുകൊണ്ടിരുന്നത്. നാലിന് നടക്കുന്ന മത്സരത്തില്‍ ഗോകുലം രണ്ടാം ഹോം മത്സരത്തില്‍ ചെന്നൈ സിറ്റി എഫ്.സിയെ നേരിടും. ഇന്നലെ നടന്ന മറ്റൊരു മത്സരത്തില്‍ ചാംപ്യന്‍മാരായ മിനര്‍വ പഞ്ചാബിനെ എതിരില്ലാത്ത ഒരു ഗോളിന് തോല്‍പ്പിച്ച് റിയല്‍ കശ്മിര്‍ ഐ ലീഗില്‍ വരവറിയിച്ചു.
രണ്ടാം ഡിവിഷനില്‍നിന്ന് ചാംപ്യന്‍മാരായി ഐ ലീഗിലെത്തിയ ടീം ആദ്യ മത്സരത്തില്‍ തന്നെ കഴിഞ്ഞ വര്‍ഷത്തെ ചാംപ്യന്‍മാരെ തകര്‍ത്താണ് വരവറിയിച്ചത്.
74-ാം മിനുട്ടില്‍ നോഹിര്‍ ക്രിസോയാണ് റിയല്‍ കശ്മിരിനായി ഗോള്‍ നേടിയത്. ആദ്യ മത്സരത്തില്‍ സമനിലയുണ്ടായിരുന്ന മിനര്‍വക്ക് രണ്ടാം മത്സരത്തിലെ തോല്‍വി അപ്രതീക്ഷിത തിരിച്ചടിയായി. റിയല്‍ കശ്മിരിന് ചര്‍ച്ചില്‍ ബ്രദേഴ്‌സുമായിട്ടാണ് രണ്ടാം മത്സരം.