മഞ്ചേരി: വുഷു ദേശീയ മീറ്റില്‍ കേരളത്തിനായി പൊരുതാന്‍ കിഴിശ്ശേരി കുഴിയംപറമ്പ് സ്വദേശി.
പഞ്ചാബിലെ ചണ്ഡിഗഡില്‍ ഈ മാസം 20 വരെ നടക്കുന്ന ദേശീയ വിഷു ചാമ്പ്യന്‍ ഷിപ്പിലാണ് കേരളത്തിനായി റുക്‌സീന ജബിന്‍ മത്സരിക്കുന്നത്.
പൂക്കൊളത്തൂര്‍ സി.എച്ച്.എം ഹയര്‍ സെക്കന്‍ഡറി സ്‌കൂളിലെ പത്താംതരം വിദ്യാര്‍ഥിനിയാണ് റുക്‌സീന.
കഴിഞ്ഞ ദിവസം തിരുവനന്തപുരം ആറ്റിങ്ങലില്‍ സമാപിച്ച സംസ്ഥാന വുഷു ചാമ്പ്യന്‍ഷിപ്പില്‍ 56 കിലോ വിഭാഗത്തില്‍ റുക്‌സീന മലപ്പുറത്തിനായി ഗോള്‍ഡ് മെഡല്‍ നേടിയിരുന്നു.
ഈ വര്‍ഷം മലപ്പുറത്ത് നടന്ന ജൂഡോ ചാമ്പ്യന്‍ ഷിപ്പിലും സ്വര്‍ണമെഡല്‍ നേടിയിട്ടുണ്ട്. കുഴിയംപറമ്പ് പൈക്കാട്ടുചാലില്‍ അഷ്‌റഫിന്റെയും സൈനബയുടെയും മകളാണ്.
യുനൈറ്റഡ് മാര്‍ഷല്‍ ആര്‍ട്‌സ് അക്കാദമിയിലെ റാഷിദിന് കീഴിലാണ് പരിശീലനം. സ്‌കൂള്‍ കായികാധ്യാപകന്‍ ഒ.പി സാദിക്കലി മാസ്റ്ററുടെ നേതൃത്വത്തില്‍ സ്‌കൂള്‍ കായിക ക്ലബ് യാത്രയയപ്പ് നല്‍കി.