ആലക്കോട്: മണക്കടവ് മുക്കട പുഴക്ക് കുറുകെയുള്ള നടപ്പാലം പുനര്‍നിര്‍മിക്കണമെന്ന ആവശ്യം ശക്തമാകുന്നു. ബസ് സര്‍വിസുള്ള മറുകരയില്‍ എത്തണമെങ്കില്‍ കിലോമീറ്ററുകള്‍ ചുറ്റി സഞ്ചരിക്കേണ്ട അവസ്ഥയിലാണ് പ്രദേശവാസികള്‍. ശക്തമായ കുത്തൊഴുക്കുള്ള പുഴയ്ക്കു കുറുകെ 23 വര്‍ഷം മുമ്പാണ് നടപ്പാലം നിര്‍മിച്ചത്. ഇരുമ്പ് തൂണുകള്‍ കൊണ്ട് നിര്‍മിച്ച നടപ്പാലത്തിന്റെ പലഭാഗങ്ങളും കാലപ്പഴക്കത്താല്‍ തുരുമ്പെടുത്ത നിലയിലാണ്. വിദ്യാര്‍ഥികള്‍ ഉള്‍പ്പെടെ നൂറുകണക്കിന് യാത്രക്കാരാണ് ദിവസേന ഇതുവഴി കടന്നുപോകുന്നത്. പാലത്തിന് സമീപം വരെ റോഡുണ്ടെങ്കിലും മെയിന്‍ റോഡിലേക്ക് വാഹനം എത്തണമെങ്കില്‍ അഞ്ചു കിലോമീറ്ററിലധികം ദൂരം സഞ്ചരിക്കണം. കാല്‍നട യാത്രക്കാണ് പാലം നിര്‍മിച്ചതെങ്കിലും ഇരുചക്ര വാഹനങ്ങള്‍ ഇതുവഴി കടന്നുപോകാന്‍ തുടങ്ങിയത് പാലത്തിന്റെ ബലക്ഷയത്തിനു കാരണമാകുന്നുണ്ട്. പുഴയ്ക്ക് കുറുകെ വീതിയുള്ള ഒരു കോണ്‍ക്രീറ്റ് പാലം വേണമെന്ന് നാട്ടുകാരുടെ ആവശ്യത്തിനു മുന്നില്‍ ഇതുവരെയും അധികൃതര്‍ കണ്ണ് തുറന്നിട്ടില്ല.