തിരുവനന്തപുരം: സംസ്ഥാനത്തു 14 ജില്ലകളിലെ 39 തദ്ദേശ സ്വയംഭരണ വാര്‍ഡുകളില്‍ ഈ മാസം 29ന് ഉപതെരഞ്ഞെടുപ്പ് നടക്കും. തിരുവനന്തപുരം, കൊല്ലം, ആലപ്പുഴ, കോട്ടയം, ഇടുക്കി, എറണാകുളം, തൃശൂര്‍, പാലക്കാട്, മലപ്പുറം, കണ്ണൂര്‍, കാസര്‍കോട് ജില്ലകളിലെ 27 ഗ്രാമപഞ്ചായത്ത് വാര്‍ഡുകളിലും എറണാകുളം, പാലക്കാട്, മലപ്പുറം, കോഴിക്കോട്, കണ്ണൂര്‍ ജില്ലകളിലെ ഓരോ ബ്ലോക്ക് പഞ്ചായത്ത് വാര്‍ഡുകളിലും പത്തനംതിട്ട ജില്ലയിലെ രണ്ടും എറണാകുളം, തൃശൂര്‍, മലപ്പുറം, വയനാട് ജില്ലകളിലെ ഓരോ നഗരസഭാ വാര്‍ഡുകളിലും തിരുവനന്തപുരം കോര്‍പറേഷനിലെ ഒരു വാര്‍ഡിലുമാണ് ഉപതെരഞ്ഞെടുപ്പ്.
തെരഞ്ഞെടുപ്പ് വിജ്ഞാപനം അഞ്ചിനു പുറപ്പെടുവിക്കും. നാമനിര്‍ദേശ പത്രിക 12 വരെ സമര്‍പ്പിക്കാം. സൂക്ഷ്മപരിശോധന 13നു നടക്കും. സ്ഥാനാര്‍ഥിത്വം പിന്‍വലിക്കാനുള്ള അവസാന തീയതി 15 ആണ്. വോട്ടെടുപ്പ് 29നു രാവിലെ ഏഴു മുതല്‍ വൈകിട്ട് അഞ്ചുവരെ നടക്കും. 30ന് രാവിലെ 10 നാണ് വോട്ടെണ്ണല്‍.