പൊന്നാനി: റമദാനില്‍ യാചകവേഷത്തില്‍ തട്ടിപ്പുസംഘങ്ങള്‍ വിലസുന്നു. പൊന്നാനിയില്‍ മദ്യപിച്ച് മുസ്‌ലിം വേഷത്തില്‍ യാചനക്കിറങ്ങിയ യുവാക്കളെ നാട്ടുകാര്‍ പിടികൂടി.
റമദാനില്‍ യാചക വേഷത്തില്‍ നിരവധി തട്ടിപ്പുസംഘങ്ങളാണ് ജില്ല ലക്ഷ്യമാക്കി എത്തുന്നത്. മുസ്‌ലിം വേഷങ്ങള്‍ കെട്ടിയാണ് ഇവര്‍ യാചനക്കെത്തുന്നത്. ഇങ്ങനെ വേഷം കെട്ടിക്കാനായി ഒരു മാഫിയ തന്നെ കുറ്റിപ്പുറം, തിരൂര്‍ അടക്കമുള്ള സ്ഥലങ്ങളില്‍ പ്രവര്‍ത്തിക്കുന്നുണ്ട് .
പൊന്നാനിയില്‍ ഇത്തരത്തില്‍ തട്ടിപ്പ് നടത്തിയവര്‍ നന്നായി മദ്യപിച്ചിരുന്നു .ഇതാണ് തട്ടിപ്പ് പുറത്താകാന്‍ കാരണം. പത്തണംതിട്ട സ്വദേശിയായ സന്തോഷ്‌കുമാര്‍, അടൂര്‍ സ്വദേശിയായ ഗോവിന്ദപിള്ള എന്നിവരെയാണ് നാട്ടുകാര്‍ കൈയോടെ പിടികൂടിയത്. പൊന്നാനി ബസ് സ്റ്റാന്‍ഡ് പരിസരത്ത് വച്ചാണ് സംശയം തോന്നിയ നാട്ടുകാര്‍ ഇവരെ പിടികൂടിയത്. ആദ്യം ഇവര്‍ രക്ഷപ്പെടാന്‍ മുസ്‌ലിം പേരുകളാണ് പറഞ്ഞെതെങ്കിലും കൂടുതല്‍ ചോദ്യം ചെയ്തപ്പോള്‍ സ്വന്തം പേര് വെളിപ്പെടുത്തുകയായിരുന്നു.
ഒടുവില്‍ നാട്ടുകാര്‍ ഇവരെ താക്കീത് നല്‍കി വിട്ടയച്ചു.