കോഴിക്കോട്: അഞ്ചിനു രാവിലെ ആറു മുതല്‍ ഉച്ചയ്ക്ക് രണ്ടുവരെ കോഴിക്കോട് കോര്‍പറേഷന്‍ പരിധിയില്‍ ഓട്ടോ-ടാക്‌സി ലൈറ്റ് മോട്ടോര്‍ വാഹനതൊഴിലാളികള്‍ പണിമുടക്കും. ജില്ലാ സംയുക്ത മോട്ടോര്‍ തൊഴിലാളി കോഡിനേഷന്‍ കമ്മിറ്റിയുടെ ആഭിമുഖ്യത്തിലാണു പണിമുടക്ക്. പണിമുടക്കിയ തൊഴിലാളികള്‍ കലക്ടറേറ്റ് മാര്‍ച്ചും ധര്‍ണയും നടത്തും.
ഓട്ടോ-ടാക്‌സി ചാര്‍ജ് വര്‍ധന നടപ്പാക്കാതെ നീട്ടിക്കൊണ്ടുപോകുന്നതില്‍ പ്രതിഷേധിച്ച് അഞ്ചിനു താലൂക്ക് കേങ്ങ്രളില്‍ മാര്‍ച്ചും ധര്‍ണയും നടത്താനും സംയുക്ത മോട്ടോര്‍ തൊഴിലാളി യൂനിയനുകളുടെ യോഗം തീരുമാനിച്ചു. കുത്തക കമ്പനികളായ യൂബര്‍, ഒലെ ഓണ്‍ലൈന്‍ ടാക്‌സികള്‍ കടന്നുകയറി പരമ്പരാഗത ഓട്ടോതൊഴിലാളികളുടെ തൊഴിലും വരുമാനവും ഇല്ലാതാക്കുകയാണ്. നിയമപരമല്ലാതെ സര്‍വിസ് നടത്തുന്ന ഇത്തരം കുത്തക ടാക്‌സികള്‍ക്കു സംരക്ഷണം നല്‍കുന്ന നടപടി പ്രതിഷേധാര്‍ഹവും അവസാനിപ്പിക്കേണ്ടതാണെന്നും യോഗം ചൂണ്ടിക്കാട്ടി. ഇത്തരം ആവശ്യങ്ങള്‍ ഉന്നയിച്ചാണു പണിമുടക്കും ധര്‍ണയും നടത്തുന്നത്. വടകര, കൊയിലാണ്ടി, താമരശേരി എന്നീ താലൂക്ക് കേന്ദ്രങ്ങളിലും പേരാമ്പ്ര ആര്‍.ടി ഓഫിസ്, ഫറോക്ക് ട്രഷറി എന്നിവിടങ്ങിലേക്ക് മാര്‍ച്ചും ധര്‍ണയും നടത്തും.
യോഗത്തില്‍ വി.സി സേതുമാധവ് അധ്യക്ഷനായി. ബിജു ലാല്‍, ഹേമന്ദ് കുമാര്‍ (സി.ഐ.ടി.യു), കെ.സി ശശികുമാ, ജയപ്രകാശന്‍ (ഐ.എന്‍.ടി.യു.സി), പി.കെ നാസര്‍, യു. സതീശന്‍ (എ.ഐ.ടി.യു.സി), യു.എ ഗഫൂര്‍, സി.വി ഇസ്മാഈല്‍, (എസ്.ടി.യു), ബിജു ആന്റണി, നീലിയോട്ട് നാണു, മുസമ്മില്‍ (എച്ച്.എം.എസ്) സംസാരിച്ചു. സി.പി മജീദ് നന്ദി പറഞ്ഞു.