ഹരിപ്പാട്: ദര്‍ശനപുണ്യം തേടിയെത്തിയ പതിനായിരങ്ങള്‍ സര്‍വ്വാഭരണ വിഭൂഷകനായ നാഗരാജാവിനെ കണ്ടു തൊഴുത് പുള്ളുവന്‍ പാട്ടിന്റെ അലയൊലികളാല്‍ മുഖരിതമായ മണ്ണാറശ്ശാലയുടെ പുണ്യ ഭൂമിയില്‍ നാഗരാജാവിന്റെ തിരുനാളില്‍ കുടുംബ കാരണവരുടെ മുഖ്യ കാര്‍മ്മികത്വത്തില്‍ പൂജകള്‍ നടന്നു.കാവുകളിലെ വന്‍ മരങ്ങള്‍ വെഞ്ചാമരം വീശി നിന്ന പുണ്യദിനത്തില്‍ പ്രാര്‍ത്ഥനയാലും, നാഗസ്തുതികളാലും അന്തരീക്ഷം മുഖരിതമായി. നാഗരാജാവിന്റെ പിറന്നാള്‍ ദിനത്തില്‍ അനുകൂലമായി നിന്ന കാലാവസ്ഥയും അകമ്പടി സേവിച്ചപ്പോള്‍ ഭക്തര്‍ക്ക് നിലവറയ്ക്ക് സമീപം അമ്മ ദര്‍ശന പുണ്യമേകി. ആയില്യം നാളില്‍ വെളുപ്പിന് മുതല്‍ ക്ഷേത്രത്തില്‍ വന്‍ ജനാവലിയാണ് എത്തിയത്. ഭക്തജനത്തിരക്ക് നിയന്ത്രിക്കാന്‍ പൊലീസ് സേനയ്‌ക്കൊപ്പം മുഴുവന്‍ കാര്യങ്ങളിലും സേവാ ഭാരതി, ആര്‍.എസ്.എസ് പ്രവര്‍ത്തകരുടെ സേവനവും ക്ഷേത്രത്തില്‍ ഉണ്ടായിരുന്നു.
വലിയമ്മയുടെ അനാരോഗ്യം കാരണം ആയില്യം എഴുന്നള്ളത്തും തുടര്‍ന്നുള്ള പൂജകളും ഇല്ലാത്തതിനാല്‍ ഉച്ചയ്ക്ക് മുമ്പ് ക്ഷേത്ര നടയിലും, തുടര്‍ന്ന് നിലവറയ്ക്ക് സമീപവും വിവിധ മേള വാദ്യങ്ങളുടെ സേവ നടന്നു. മഹാപ്രസാദമൂട്ടില്‍ പതിനായിരങ്ങള്‍ പങ്കുകൊണ്ടു. ആയില്യ മഹോത്സവത്തോട് അനുബന്ധിച്ച് നടന്ന മഹാപ്രസാദമൂട്ടില്‍ പതിനായിരങ്ങള്‍ പങ്കുകൊണ്ടു.
കൈപുണ്യത്തിന്റെ പതിനാറാമാണ്ടിലും പഴയിടം മോഹനന്‍ നമ്പൂതിരിയാണ് മഹാപ്രസാദമൂട്ടിന് നേതൃത്വം നല്‍കിയത്.