തിരുവനന്തപുരം: പാപ്പനംകോട് മേലാങ്കോടിന് സമീപം എന്‍.എസ്.എസ് കരയോഗ മന്ദിരത്തിന് നേരെ കല്ലേറ്. വ്യാഴാഴ്ച്ച രാത്രിയിലാണ് കല്ലേറുണ്ടായത്. ആക്രമണത്തില്‍ ചട്ടമ്പി സ്വാമി സമൃതി മണ്ഡപത്തിന്റെ ജനല്‍ചില്ല് തകര്‍ന്നിട്ടുണ്ട്. അക്രമികള്‍ ജനറല്‍ സെക്രട്ടറി ജി. സുകുമാരന്‍ നായരുടെ പേരില്‍ റീത്തും സ്ഥാപിച്ചു.

കൊടിമരത്തിന്റെ ചുവട്ടിലാണ് റീത്ത് വെച്ചിരിക്കുന്നത്. ഫോറന്‍സിക് വിദഗ്ധരെത്തി പരിശോധന നടത്തിയതിന് ശേഷം റീത്ത് എടുത്തുമാറ്റി.

സംഭവത്തിനു പിന്നില്‍ ആരാണെന്ന സൂചന ലഭിച്ചിട്ടില്ല. പൊലിസ് കേസെടുത്ത് അന്വേഷണം ആരംഭിച്ചിട്ടുണ്ട്.

കഴിഞ്ഞ ദിവസം ശബരിമല സ്ത്രീ പ്രവേശനത്തിനെതിരെ എന്‍.എസ്.എസ് നാമജപ യജ്ഞം നടത്തിയിരുന്നു. ഇതില്‍ പ്രകോപിതരായവരാണ് ആക്രമണത്തിന് പിന്നിലെന്ന് സംശയിക്കുന്നതായി എന്‍.എസ്.എസ് ഭാരവാഹികള്‍ പറഞ്ഞു.