നെയ്യാറ്റിന്‍കര: കാട്ടാക്കട, തൂങ്ങാംപാറ, പേയാട്, ചെമ്പൂര് തുടങ്ങിയ ഭാഗങ്ങളില്‍ നടത്തിയ റെയ്ഡില്‍ 30 ലിറ്റര്‍ സ്പിരിറ്റും 16 ലിറ്റര്‍ ചാരായവും 120 ലിറ്റര്‍ കോടയുമായി നാലുപേര്‍ പിടിയിലായി. നെയ്യാറ്റിന്‍കര എക്‌സൈസ് ഷാഡോ സംഘവും ഇന്റലിജന്‍സും സംയുക്തമായാണ് റെയ്ഡ് നടത്തിയത്. വാറ്റുപകരണങ്ങളും മദ്യം കടത്താന്‍ ഉപയോഗിച്ച രണ്ടുവാഹനങ്ങളും പിടികൂടിയിട്ടുണ്ട്.
സംഭവവുമായി ബന്ധപ്പെട്ട് ആര്യനാട് മലവിള സ്വദേശി വിനോദ് (35), പേയാട് സ്വദേശി സുധി സുരേഷ് (29), സൂസന്‍ എന്ന സാം വത്സലം (35), ചെമ്പൂര് സ്വദേശി തമ്പി എന്ന ചന്ദ്രന്‍ (46) എന്നിവരാണു പിടിയിലായത്. പേയാടിനു സമീപം വീട് വാടകയ്‌ക്കെടുത്ത് ചാരായം വാറ്റിയും സ്പിരിറ്റ് കൊണ്ടുവന്നു നേര്‍പ്പിച്ചു ചാരായമാക്കിയുമാണു വില്‍പ്പന നടത്തിയിരുന്നത്. വാറ്റ് കേന്ദ്രത്തെക്കുറിച്ച് അറിവ് കിട്ടിയതിനെ തുടര്‍ന്നു പ്രതികളെ 15 ദിവസത്തിലധികമായി ഷാഡോ ടീം നിരീക്ഷണം നടത്തിയാണ് പിടികൂടിയത്.
നെയ്യാറ്റിന്‍കര എക്‌സൈസ് സര്‍ക്കിള്‍ ഇന്‍സ്‌പെക്ടര്‍ വൈ. ഷിബുവിന്റെ നേതൃത്വത്തില്‍ നടന്ന റെയ്ഡില്‍ ഇന്‍സ്‌പെക്ടര്‍ കോമളന്‍, പ്രിവന്റീവ് ഓഫിസര്‍മാരായ ഷാജു, ഗോപകുമാര്‍, രാജേഷ്, ബിജുകുമാര്‍, സിവില്‍ എക്‌സൈസ് ഓഫിസര്‍മാരായ വിശാഖ്, ഹരിപ്രസാദ്, രഞ്ജിത്ത്, ശങ്കര്‍, അഖില്‍, സുരേഷ്, സനല്‍ പങ്കെടുത്തു.