ന്യൂഡല്‍ഹി: ഇ സിഗരറ്റ്, ഇ ഹുക്ക തുടങ്ങിയവ രാജ്യത്ത് നിരോധിച്ചു. ഇതു സംബന്ധിച്ച ഓര്‍ഡിനന്‍സിന് മന്ത്രിസഭായോഗം അംഗീകാരം നല്‍കി. ഇ സിഗരറ്റ് ഉപയോഗിക്കുന്നതിന് പുറമെ അതിന്റെ നിര്‍മാണം, കയറ്റുമതി, ഇറക്കുമതി, വില്‍പന, വിതരണം, സൂക്ഷിച്ചുവയ്ക്കല്‍, പരസ്യം ചെയ്യല്‍ തുടങ്ങിയവയും നിരോധിച്ചു.
ഇ സിഗരറ്റുകളുണ്ടാക്കുന്ന ആരോഗ്യപ്രശ്‌നങ്ങള്‍ പരിഗണിച്ചാണ് നിരോധനമെന്ന് മന്ത്രിസഭായോഗ തീരുമാനം വിശദീകരിച്ച് ധനമന്ത്രി നിര്‍മലാ സീതാരാമന്‍ പറഞ്ഞു. 2011നും 2016നും ഇടയില്‍ ഇ സിഗരറ്റ് ഉപയോഗത്തില്‍ 900 ശതമാനത്തിന്റെ വര്‍ധനവുണ്ടായതായി അമേരിക്കയിലെ പഠനം ചൂണ്ടിക്കാട്ടി മന്ത്രി വിശദീകരിച്ചു. അമേരിക്കയിലെ അനുഭവം മുന്‍നിര്‍ത്തിയാണ് ഇന്ത്യയില്‍ വ്യാപകമാവും മുമ്പുതന്നെ അതുനിരോധിക്കുന്നതെന്നും മന്ത്രി പറഞ്ഞു.
ഇ സിഗരറ്റുകള്‍, അല്ലെങ്കില്‍ ഇലക്ട്രോണിക് പുകവലിയുപകരണങ്ങള്‍ എന്നിവയുടെ ഉപയോഗത്തില്‍ അമേരിക്കയിലെ വിദ്യാര്‍ഥികള്‍ക്കിടയില്‍ 77.8 ശതമാനത്തിന്റെ വര്‍ധന സമീപകാലത്തുണ്ടായതായും ഏഴു പേര്‍ ഇതുമൂലം അവിടെ കൊല്ലപ്പെട്ടതായും നിര്‍മലാ സീതാരാമന്‍ ചൂണ്ടിക്കാട്ടി. ഇ സിഗറ്റുകള്‍ നിയന്ത്രിക്കാര്‍ സര്‍ക്കാര്‍ നേരത്തെയും ചില നടപടികള്‍ സ്വീകരിച്ചിരുന്നു. കഴിഞ്ഞ വര്‍ഷം ഓഗസ്റ്റ് 28ന് ഇ സിഗരറ്റുകള്‍ നിര്‍മിക്കുകയോ വില്‍ക്കുകയോ ചെയ്യുന്നില്ലെന്ന് ഉറപ്പാക്കാന്‍ കേന്ദ്രആരോഗ്യമന്ത്രാലയം സംസ്ഥാനങ്ങള്‍ക്കും കേന്ദ്രഭരണപ്രദേശങ്ങള്‍ക്കും നിര്‍ദ്ദേശം നല്‍കി.