ഒറ്റപ്പാലം: അക്ഷരലക്ഷം സാക്ഷരത പഠിതാക്കള്‍ക്ക് സര്‍ട്ടിഫിക്കറ്റുകള്‍ വിതരണം ചെയ്തു. സംസ്ഥാന സാക്ഷരതാ മിഷന്‍ അതോറിറ്റിയുടെ നേതൃത്വത്തില്‍ നടത്തിയ സാക്ഷരതാ പരീക്ഷയായ അക്ഷരലക്ഷം പദ്ധതിയിലെ പഠിതാക്കളായി വിജയിച്ചവര്‍ക്കാണ് തുല്യതാ സര്‍ട്ടിഫിക്കറ്റ് വിതരണം നടത്തിയത്. സര്‍ട്ടിഫിക്കറ്റിന്റെ ഒറ്റപ്പാലം ബ്ലോക്ക്തല വിതരണോദ്ഘാടനം ജില്ലാ പഞ്ചായത്ത് അംഗം സന്ധ്യ നിര്‍വഹിച്ചു.
വാണിയംകുളം ആശാദീപം സ്‌കൂളില്‍ വച്ച് നടന്ന പരിപാടിയില്‍ 44 പഠിതാക്കളാണ് സര്‍ട്ടിഫിക്കറ്റ് ഏറ്റുവാങ്ങിയത്. ജില്ലയില്‍ അംഗ പരിമിതരായ പഠിതാക്കള്‍ ഏറ്റവും കൂടുതലുള്ള പഠന കേന്ദ്രമായിരുന്നു വാണിയംകുളത്തേത്. ഗ്രാമപഞ്ചായത്ത് വികസന സ്റ്റാന്റിങ് കമ്മിറ്റി ചെയര്‍മാന്‍ കെ. അനിത അധ്യക്ഷയായി.
ആശാദീപം സ്‌കൂള്‍ പ്രിന്‍സിപ്പല്‍ സിസ്റ്റര്‍ ഫ്‌ളോറി, നോഡല്‍ പ്രേരക്മാരായ സന്ധ്യ എസ്.കെ നായര്‍, ടി.പി പ്രദീപ് കുമാര്‍, പ്രേരക്മാരായ എ.പി സൂരജ് ബാബു, വി. സുനിത സംസാരിച്ചു.