പൊന്നാനി: ഭാരതപ്പുഴയില്‍ മണല്‍കടത്ത് വ്യാപകം. അനധികൃതമായി മണലെടുത്ത മുപ്പതോളം തോണികള്‍ പൊലിസ് പിടികൂടി. മണലെടുപ്പിന് കര്‍ശന നിയന്ത്രണം നിലനില്‍ക്കുന്നതിനാല്‍ ഭാരതപ്പുഴയില്‍ നിന്നും വ്യാപകമായ രീതിയിലാണ് മണലെടുപ്പ് നടക്കുന്നത്. 

പൊന്നാനി ഈശ്വരമംഗലം ഭാഗത്ത് മണല്‍കടത്ത് വ്യാപകമാണെന്ന ആരോപണത്തെ തുടര്‍ന്നാണ് പൊലിസ് പരിശോധന നടത്തിയത്.രാവിലെ നടത്തിയ പരിശോധനയില്‍ അനധികൃതമായി മണല്‍ കടത്തുകയായിരുന്ന മുപ്പതോളം തോണികളാണ് പിടികൂടിയത്.
തോണികളില്‍ കൊണ്ടുവന്ന മണല്‍ ഭാരതപ്പുഴ കക്കരികെ കൂട്ടിയിട്ട് രാത്രികാലങ്ങളില്‍ മണല്‍ മാഫിയ ആവശ്യക്കാര്‍ക്ക് എത്തികൊടുക്കുകയാണ്. ഇത്തരത്തില്‍ മണല്‍ കടത്തുകയായിരുന്ന നാല് വാഹനങ്ങള്‍ ദിവസങ്ങള്‍ക്ക് മുമ്പ് പിടികൂടിയിരുന്നു.ഇതിന്റെ തുടര്‍ച്ചയെന്നോണമാണ് തോണികളില്‍ കടത്തുകയായിരുന്ന മണല്‍ പിടികൂടിയത്. വഞ്ചികളിലുണ്ടായിരുന്ന മണല്‍ ജെ.സി.ബി.ഉപയോഗിച്ച് കര്‍മ്മ റോഡിലേക്ക് മാറ്റി. തുടര്‍ന്ന് മണല്‍ ഭാരതപ്പുഴയിലേക്ക് തന്നെ തിരിച്ചു തള്ളി. മണല്‍ എടുക്കാന്‍ കഴിയാത്ത തരത്തില്‍ കരിങ്കല്ലുകള്‍ ഭാരതപ്പുഴയോരത്ത് ഇടുകയും ചെയ്തു. ഇനിയും മണലെടുപ്പ് തുടര്‍ന്നാല്‍ പോലീസ് ബോട്ട് വഴി എത്തി വഞ്ചികള്‍ തകര്‍ക്കാനുള്ള നടപടി സ്വീകരിക്കുമെന്ന് പൊന്നാനി എസ്.ഐ.കെ.പി.വാസു പറഞ്ഞു. മേഖലയില്‍ പൊലീസ് പട്രോളിംഗ് ശക്തമാക്കാനാണ് നീക്കം.