14000 തൊഴിലുകള്‍ സഊദിവല്‍ക്കരിക്കും നടപടികള്‍ തുടങ്ങി

റിയാദ്: സഊദിയില്‍ സ്വദേശികള്‍ക്ക് കൂടുതല്‍ തൊഴില്‍ നല്‍കുന്നതിന്റെ ഭാഗമായി ഐടി, ടെലികോം മേഖലയില്‍ 14000 തൊഴിലുകള്‍ സഊദിവല്‍ക്കരിക്കാന്‍ നടപടികള്‍ തുടങ്ങി. കമ്യൂണിക്കേഷന്‍സ് ആന്റ് ഇന്‍ഫര്‍മേഷന്‍ ടെക്‌നോളജി മന്ത്രാലയവും തൊഴില്‍, സാമൂഹിക വികസന മന്ത്രാലയത്തിനു കീഴിലെ മാനവശേഷി വികസന നിധിയുടെയും സംയുക്ത നീക്കത്തിലാണ് പുതിയ പദ്ധതി നടപ്പിലാക്കുന്നത്. രണ്ടു മേഖലകളിലെയും വിവിധ കാറ്റഗറികളില്‍ വിദേശികളെ ഒഴിവാക്കി പകരം സ്വദേശികളെ നിയമിക്കാനാണ് പദ്ധതികള്‍ ആസൂത്രണം ചെയ്യുന്നത്. ജിദ്ദ ലിഖാആത്ത്2019 ഫോറത്തോടനുബന്ധിച്ചാണ് സംയുക്ത പദ്ധതി ആരംഭിച്ചത്.
നാലു ഘട്ടങ്ങളായാണ് പദ്ധതി നടപ്പാക്കുക. ആദ്യ ഘട്ടത്തില്‍ ടെക്‌നിക്കല്‍ സപ്പോര്‍ട്ട് തൊഴിലുകളും രണ്ടാം ഘട്ടത്തില്‍ ഡാറ്റാ അനാലിസിസ് തൊഴിലുകളും സൗദിവല്‍ക്കരിക്കുന്നതിന് ഊന്നല്‍ നല്‍കും. പ്രൊജക്ട് മാനേജര്‍, കോള്‍ സെന്റര്‍ ജീവനക്കാര്‍ എന്നീ ജോലികള്‍ സ്വദേശിവല്‍ക്കരിക്കുന്നതിനാണ് മൂന്നും നാലും ഘട്ടങ്ങളില്‍ ശ്രമിക്കുകയെന്നും ഡെപ്യൂട്ടി കമ്യൂണിക്കേഷന്‍സ് ആന്റ് ഇന്‍ഫര്‍മേഷന്‍ ടെക്‌നോളജി മന്ത്രി എന്‍ജിനീയര്‍ ഹൈഥം അല്‍ഊഹലി പറഞ്ഞു. ടെലികോം, ഐ.ടി മേഖലയിലേക്ക് സൗദി ഉദ്യോഗാര്‍ഥികളെ ആകര്‍ഷിക്കുന്നതിനും പരിശീലനത്തിലൂടെ അവരെ പ്രാപ്തരാക്കി മാറ്റുന്നതിനും ടെലികോം, ഐ.ടി സ്ഥാപനങ്ങള്‍ക്ക് സഹായങ്ങള്‍ നല്‍കാനും പദ്ധതികളുണ്ട്. ആര്‍ട്ടിഫിഷ്യല്‍ ഇന്റലിജന്‍സ്, ഇന്റര്‍നെറ്റ് ഓഫ് തിംഗ്‌സ്, പ്രോഗ്രാം ഡെവലപ്‌മെന്റ്, ഗെയിം ഡെവലപ്‌മെന്റ്, ഡാറ്റാ ബേസ്, പ്രോഗ്രാം ക്വാളിറ്റി, ആപ്പ്‌നെറ്റ്‌വര്‍ക്ക് മാനേജ്‌മെന്റ്, ഓപ്പറേഷന്‍സ് എന്നീ മേഖലകളിലെ തൊഴിലുകള്‍ സ്വദേശിവല്‍ക്കരിക്കുന്നതിന് സഹായങ്ങള്‍ ലഭിക്കുമെന്നു മാനവശേഷി വികസന നിധി ഡയറക്ടര്‍ ജനറല്‍ ഡോ.മുഹമ്മദ് അല്‍സുദൈരി പറഞ്ഞു.