തിരുവനന്തപുരം: വാട്ടര്‍ അതോറിറ്റിയുടെ മീറ്റര്‍ റീഡിങ് എടുക്കാന്‍ ചുമതലപ്പെടുത്തിയ കരാര്‍ ജീവനക്കാരുടെ എണ്ണം കുറയ്ക്കാന്‍ തീരുമാനം. ആദ്യം ഗ്രാമപ്രദേശങ്ങളിലാണ് എണ്ണം കുറയ്ക്കുന്നത്. ഇവിടെ മീറ്റര്‍ റീഡിങ് നാലു മാസത്തിലൊരിക്കല്‍ ആക്കാനും ജല അതോറിറ്റി തീരുമാനിച്ചു. കഴിഞ്ഞ ആഴ്ച കൂടിയ ബോര്‍ഡ് യോഗത്തിലാണ് തീരുമാനം. ജല അതോറിറ്റിയുടെ ചെലവ് കുറയ്ക്കാന്‍ വേണ്ടിയാണ് മീറ്റര്‍ റീഡര്‍മാരുടെ എണ്ണം കുറയ്ക്കുന്നത്. കരാര്‍ ജീവനക്കാരന്‍ 1,200 വീടുകളാണ് രണ്ടു മാസത്തിലൊരിക്കല്‍ റീഡിങ് എടുക്കുന്നത്. 13 രൂപയാണ് ഒരു വീടിന് പ്രതിഫലം. നാലു മാസത്തിലൊരിക്കല്‍ ആകുമ്പോള്‍ ഇതേ തുക നല്‍കിയാല്‍ മതിയെന്നും ബോര്‍ഡ് വിലയിരുത്തി. ഗ്രാമ പ്രദേശങ്ങളില്‍ പരീക്ഷിച്ചതിനു ശേഷം നഗര പ്രദേശങ്ങളിലേക്ക് വ്യാപിപ്പിക്കാനും വാട്ടര്‍ അതോറിറ്റിക്ക് ആലോചനയുണ്ട്. അതിനിടെ, കുടിശ്ശിക പിരിച്ചെടുക്കാനുള്ള നടപടികളും ബോര്‍ഡ് യോഗം തീരുമാനിച്ചു.
ബില്‍ തുക അടയ്ക്കാത്തവരുടെ പട്ടിക തയാറാക്കി അവരുടെ  കണക്ഷന്‍  വിച്ഛേദിക്കും. ഭീമമായ ബില്‍ അടയ്ക്കാനുള്ളവര്‍ക്കെതിരേ നിയമനടപടി സ്വീകരിക്കാനും ബോര്‍ഡ് യോഗം തീരുമാനിച്ചു.