മലപ്പുറം: ദാറുല്‍ഹുദാ ഇസ്‌ലാമിക് സര്‍വകലാശാല പൂര്‍വ വിദ്യാര്‍ഥി സംഘടന ഹാദിയക്കു കീഴില്‍ പാണക്കാട് പ്രവര്‍ത്തിക്കുന്ന ഹാദിയ സെന്റര്‍ ഫോര്‍ സോഷ്യല്‍ എക്‌സലന്‍സി (സി.എസ്.ഇ) ല്‍ പുതുതായി നിര്‍മിച്ച കെട്ടിട സമുച്ചയങ്ങള്‍ നാടിനു സമര്‍പ്പിച്ചു.സി.എസ്.ഇ അഡ്മിനിസ്‌ട്രേറ്റീവ് ബ്ലോക്ക് ദാറുല്‍ഹുദാ ചാന്‍സലര്‍ പാണക്കാട് സയ്യിദ് ഹൈദരലി ശിഹാബ് തങ്ങള്‍ ഉദ്ഘാടനം ചെയ്തു.
വിദ്യാഭ്യാസ നവോത്ഥാനത്തിലൂടെ മാത്രമേ ന്യൂനപക്ഷങ്ങള്‍ നേരിടുന്ന പിന്നാക്കാവസ്ഥക്ക് പരിഹാരമാകൂ എന്നും ദാറുല്‍ഹുദായും ഹാദിയയും നടത്തുന്ന നവജാഗരണ പ്രവര്‍ത്തനങ്ങള്‍ക്ക് സമൂഹം കരുത്ത് പകരണമെന്നും തങ്ങള്‍ പറഞ്ഞു. ദേശീയ അന്തര്‍ദേശീയ തലങ്ങളില്‍ സജീവ ഇടപെടലുകള്‍ നടത്താന്‍ ഹുദവി പണ്ഡിതര്‍ക്ക് കഴിയുമെന്നും തങ്ങള്‍ അഭിപ്രായപ്പെട്ടു.
ഓഫിസ്, ഗസ്റ്റ് ലോഞ്ച് എന്നിവയുടെ ഉദ്ഘാടനം സമസ്ത പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങള്‍ നിര്‍വഹിച്ചു. ഡിജിറ്റല്‍ ക്ലാസ്സ് റൂം സയ്യിദ് അബ്ബാസലി ശിഹാബ് തങ്ങള്‍, കൗണ്‍സലിങ് സെന്റര്‍ സയ്യിദ് മുഹമ്മദ് കോയ തങ്ങള്‍ ജമലുല്ലൈലി, ആംഫിതിയറ്റര്‍ സയ്യിദ് ബശീറലി ശിഹാബ് തങ്ങള്‍, ഹോസ്റ്റല്‍ കെട്ടിടം ഇ.ടി മുഹമ്മദ് ബശീര്‍ എം.പി, മീഡിയാ സ്റ്റുഡിയോ പി.വി അബ്ദുല്‍ വഹാബ് എം.പി എന്നിവര്‍ ഉദ്ഘാടനം ചെയ്തു. ദാറുല്‍ഹുദാ വൈസ് ചാന്‍സലര്‍ ഡോ. ബഹാഉദ്ദീന്‍ മുഹമ്മദ് നദ്‌വി അധ്യക്ഷനായി.
നിര്‍മാണ പ്രവൃത്തികള്‍ക്ക് നേതൃത്വം നല്‍കിയ എന്‍.വി ക്രിയേഷന്‍ എം.ഡി അശ്‌റഫ് എടവണ്ണപ്പാറക്ക് സയ്യിദ് ജിഫ്‌രി മുത്തുക്കോയ തങ്ങളും അബ്ദുല്‍ ബാസിതിനു സയ്യിദ് നാസിര്‍ അബ്ദുല്‍ ഹയ്യ് ശിഹാബ് തങ്ങളും ഉപഹാരം സമ്മാനിച്ചു.സി.എസ്.ഇ ചെയര്‍മാന്‍ റഷീദലി ശിഹാബ് തങ്ങള്‍ സ്വാഗതം പറഞ്ഞു. സയ്യിദ് ഹമീദലി ശിഹാബ് തങ്ങള്‍, സമസ്ത മുശാവറ അംഗം വാക്കോട് മൊയ്തീന്‍കുട്ടി ഫൈസി, സയ്യിദ് പൂക്കോയ തങ്ങള്‍, എം.എല്‍.എ മാരായ പി. ഉബൈദുല്ല, കെ.എന്‍.എ ഖാദര്‍, എസ്.എം.എഫ് സംസ്ഥാന ജന. സെക്രട്ടറി ചെമ്മുക്കന്‍ കുഞ്ഞാപ്പു ഹാജി, എസ്.വൈ.എസ് സംസ്ഥാന വര്‍ക്കിങ് സെക്രട്ടറി അബ്ദുല്‍ ഹമീദ് ഫൈസി അമ്പലക്കടവ്, കെ.എം സൈദലവി ഹാജി, അബ്ദുല്‍ മതീന്‍ സാഹിബ് പശ്ചിമ ബംഗാള്‍, അബ്ദുല്‍ ഹക്കീം ഫൈസി ആദൃശ്ശേരി, യു. ശാഫി ഹാജി ചെമ്മാട്, സി. മുഹമ്മദ് കുഞ്ഞി, ഡോ.യു.വി.കെ മുഹമ്മദ്, സി.എച്ച് ശരീഫ് ഹുദവി സംബന്ധിച്ചു .
സി.എസ്.ഇ പ്രസിദ്ധീകരണ വിഭാഗമായ ബുക് പ്ലസിന്റെ വിവിധ പുസ്തകങ്ങളുടെ പ്രകാശനം, സമസ്ത സ്ഥാപനങ്ങളുടെ അലുംനി മീറ്റ്, മീഡിയാ സ്‌കൂള്‍ കോഴ്‌സ് പൂര്‍ത്തിയാക്കിയവര്‍ക്കുള്ള സര്‍ട്ടിഫിക്കറ്റ് വിതരണം എന്നിവയും നടന്നു. സയ്യിദ് ഫൈസല്‍ ഹുദവി തളിപ്പറമ്പ് , ഡോ. സുബൈര്‍ ഹുദവി ചേകന്നൂര്‍, ടി. അബൂബക്കര്‍ ഹുദവി കരുവാരകുണ്ട്, ഡോ.അബ്ദുറഹ്മാന്‍ ഫൈസി മുല്ലപ്പള്ളി, ഐ.പി ഉമര്‍ വാഫി കാവനൂര്‍, ഫരീദ് റഹ്മാനി കാളികാവ്, പി.കെ നാസര്‍ ഹുദവി, ജാബിര്‍ ഹുദവി തൃക്കരിപ്പൂര്‍ സംസാരിച്ചു. ശരീഫ് ഹുദവി ചെമ്മാട് സ്വാഗതവും ഇ.കെ റഫീഖ് ഹുദവി കാട്ടുമുണ്ട നന്ദിയും പറഞ്ഞു.