ബദിയഡുക്ക: അതിര്‍ത്തി ഗ്രാമങ്ങളില്‍ കോഴിയങ്കം സജീവമാകുന്നു. എന്നാല്‍ ഇക്കാര്യത്തില്‍ അധികൃതര്‍ മൗനം തുടരുന്നു. ആഘോഷ ദിവസങ്ങളിലും ഞായറാഴ്ചകളിലും ബദിയഡുക്ക പൊലിസ് സ്റ്റേഷന്‍ പരിധിയിലെ ജനവാസമില്ലാത്ത പറമ്പുകളിലും കുന്നിന്‍ ചെരുവുകളിലുമാണ് കോഴിയങ്കം നടക്കുന്നത്. പൊലിസിന് ഏറ്റവും എളുപ്പത്തില്‍ എത്തിപ്പെടാന്‍ കഴിയാത്ത സ്ഥലമാണ് പലപ്പോഴും കോഴിയങ്കക്കാര്‍ തിരഞ്ഞെടുക്കുന്നത്. ചില സ്ഥലങ്ങളില്‍ പൊലിസിന്റെ അനുവാദം വാങ്ങിയാണ് കോഴിപ്പോര് നടത്തുന്നതെന്ന് വരുത്തി തീര്‍ത്താണ് നടത്തിപ്പുകാര്‍ വാതുവെപ്പുകാരെ ആകര്‍ഷിക്കുന്നത്. ആയിരങ്ങള്‍ മുടക്കിയാണ് കോഴികളെ പലയിടങ്ങളിലും പോരിനിറക്കുന്നത്. അങ്കക്കോഴിക്ക് രണ്ടായിരം മുതല്‍ അയ്യായിരം രൂപ വരെ വില നല്‍കുന്നവരുണ്ട്. വാതുവെപ്പുകാര്‍ ഒരോ ദിവസവും കോഴിയുടെ നിറം നോക്കിയാണ് വിലപേശുന്നത്. പോരിനിറക്കുന്ന കോഴിയുടെ കാലില്‍ മൂര്‍ച്ചയുള്ള അങ്കവാള്‍ കെട്ടിയാണ് പോരിനിറക്കുന്നത്. പോരിനിറക്കുന്ന മുറക്ക് വാതുവെപ്പുകാര്‍ പരസ്പരം പന്തയത്തില്‍ ഏര്‍പ്പെടും. പോരിനിറക്കുന്ന കോഴികളില്‍ ഏതുകോഴിയാണോ ചത്തുവീഴുന്നത് അവ പരാജയപ്പെടുകയും എതിര്‍കോഴിയുടെ ആള്‍ക്ക് ചത്തുവീഴുന്ന കോഴിയും പന്തയംവച്ച പണവും കിട്ടും. ഇത്തരത്തില്‍ ലക്ഷങ്ങള്‍ മുടക്കി കളിയില്‍ ഏര്‍പ്പെടുന്നവരുമുണ്ട്. അതിര്‍ത്തി ഗ്രാമങ്ങളില്‍ നേരത്തെ ക്ഷേത്ര ഉത്സവത്തിന്റെ ഭാഗമായി നടത്തിയിരുന്നുവെങ്കില്‍ ഇപ്പോള്‍ ഇത് ചൂതാട്ടം തന്നെയായി മാറിയിട്ടുണ്ട്. ബദിയടുക്ക പൊലിസ് സ്റ്റേഷന്‍ പരിധിയിലെ കിളിംഗാറിന് സമീപം കൊളമ്പെ, പള്ളത്തടുക്കക്ക് സമീപം കാടമന മാടത്തടുക്ക, ചാലക്കോട്, ഉക്കിനടുക്കയിലെ പ്ലാന്റേഷന്‍ കോര്‍പറേഷനോടു ചേര്‍ന്നു കിടക്കുന്ന കുന്നിന്‍ ചെരിവ്, പെര്‍ളക്ക് സമീപം ബജക്കുടല്‍, ബാഡൂര്‍, കൊല്ലങ്കാനത്തിനുസമീപം ഏവിഞ്ച കുന്നിന്‍ ചെരിവ് എന്നിവിടങ്ങളിലാണ് ഞായറാഴ്ച കോഴിപ്പോര് സജീവമായിട്ടുള്ളത്. കോഴിയങ്കത്തിനുപുറമെ ഇവിടെ ചൂതാട്ടവും സജീവമാണ്. പലപ്പോഴും വിവരമറിഞ്ഞാല്‍ പൊലിസിനു ഇവിടേക്ക് എത്തിപ്പെടാന്‍ കഴിയാത്ത അവസ്ഥയുമാണ്. കോഴിയങ്കത്തിനെതിരേ കര്‍ശന നടപടി ഉണ്ടാകണമെന്നാണ് നാട്ടുകാരുടെ ആവശ്യം.